Hruê gŏ sang ayŏng K’Long Ha Juil, ti alŭ 6, să Lạc Dương, čar Lâm Đồng mŭt dôk hlăm sang mrâo, jih ƀuôn mbĭt hŏng klei hơ̆k mơak. Anei jing gŏ sang knhal tuič hlăm ênoh 9 gŏ sang dưi lăm lui sang dôk êjai, bi knăl kơ jih alŭ amâo lŏ mâo ôh sang dôk tĭ rưč. Klei hdĭp sui hŏng anei kƀah êlâo kƀah êdei, ñu dleh dưi mkiêt mkriêm djăp prăk rŭ mdơ̆ng sang. Kyua hdră đru lăm lui sang dôk êjai mơ̆ng Knŭk kna, gŏ sang lui thiăm hlăm brô 250 êklăk prăk, mnuih hlăm găp djuê bi mguôp prăk, ƀuôn sang bi mguôp ai, sang prŏng siam, kjăp knhal tuč ăt dưi bi leh.

“Ayŏng amai adei, amĭ ama, mnuih ƀuôn sang hlăm ƀuôn đru, đru bi djăp prăk rŭ mdơ̆ng sa boh sang mrâo, mâo sang mơak snăk, hơĭt klei hdĭp mda leh anăn duh ƀơ̆ng”.

Ti alŭ 6, să Lạc Dương, anôk giăm 100% mnuih ƀuôn sang mâo klei đăo, klei thâo bi mguôp, thâo bi đru jing leh klei jăk siam hlăm klei hdĭp êpul êya. Amâo djŏ knŏng bi đru mdơ̆ng sang dôk, mnuih mâo klei găl lŏ đru prăk, gŏ êsei kƀah mnuih mă bruă mâo ƀĭng găp bi mguôp ai, bi mlih ai hlăm bruă pla mjing. Mduôn Lơ Mu Ha Djô, mnuih mâo khưm ti alŭ 6, jing sa hlăm dŭm čô đru mjing klei bi mguôp msĕ snăn. Hluê si dŭm klei bi kƀĭn alŭ leh anăn dŭm blư̆ bi tuôm grăp gŏ sang, ñu mtrŭt mjhar mnuih ƀuôn sang kriê dlăng bruă duh mkra, bi mlih mnơ̆ng pla, bi đru găn klei dleh dlan, lăm lui klei bhiăn kthŭl mluk leh anăn kriê kjăp klei êđăp ênang ƀuôn sang. Hŏng ñu, hdĭp "jăk klei hdĭp, jăk klei đăo" brei mphŭn mơ̆ng dŭm bruă klă sĭt.

“Ăt hâo hưn kơ arăng čiăng ngă si srăng bi mbha êsei huă, đru kơ dŭm gŏ sang kƀah êsei huă, kƀah êa mnăm, čiăng hrăm mbĭt mâo klei hdĭp hơĭt mbĭt”.

Amâo djŏ knŏng ti Lạc Dương, ti să Sơn Điền, lu phung khua mduôn, Khua bruă Đảng alŭ, ăt hur har mtrŭt mjhar mnuih ƀuôn sang hdĭp "jăk klei hdĭp, jăk klei đăo". Msĕ si ti alŭ Ka Sá, hŏng klei ktrâo atăt mơ̆ng khua mduôn, êpul bruă Đảng lehanăn êpul kiă kriê alŭ, mnuih ƀuôn sang hur har bi mlih mnơ̆ng pla, mnơ̆ng rông, boh nik mđĭ kyar kphê, klei hdĭp ƀrư̆ hruê ƀrư̆ mdrŏng siam. Hŏng hjăn khua mduôn K'Lãng, ñu ktrâo atăt mnuih ƀuôn sang alŭ Ka Sá amâo djŏ knŏng hŏng klei hâo hưn, bi kƀĭn, ƀiădah lŏ bi hmô ti anăp, mơ̆ng gŏ sang pô.

“Ti anei, knŏng mnuih ƀuôn sang jĕ giăm snăn pô mâo nao grăp sang, hŏng klei mbĭt snăn ăt hâo hưn mtô mblang hŏng dŭm klei bi kƀĭn jing phŭn... Pô brei bi hmô. Êlâo hĭn jing gŏ sang pô, djă pioh knhuah gru, dhar kreh djuê ana… lŏ mtô bi hriăm kơ anak čô êdei anei čiăng kơ amâo luič ôh knhuah gru dhar kreh”.

Să Sơn Điền mâo êbeh 2.000 čô đăo Khop leh anăn đăo Tin lành. Čiăng mđĭ lar bruă klam mơ̆ng khua mduôn, mnuih mâo kơhưm leh anăn phung khua kiă kriê klei đăo, bruă sang čư̆ êa alŭ wăl kreh bi hgŭm mtô mblang, mtrŭt mjhar mnuih ƀuôn sang mđĭ kyar bruă duh mkra, mkŏ mkra krĭng ƀuôn sang mrâo. Giăm anei, dŭm êpul êya klei đăo ti alŭ wăl sa ai hŏng hdră hluê ngă knhuah hdĭp mrâo mrang hlăm klei bi kuôl ung mô̆, klei djiê brŭ, knăm mak. Alŭ wăl ăt mtă kơ phung khua kiă kriê klei đăo bi mguôp mtô mblang, mtrŭt mjhar phung đăo hlăm dŭm mmông bi kƀĭn klei đăo grăp hruê kăm. Vũ Đức Nhuần, Khua anôk bruă sang čư̆ êa să Sơn Điền bi mklă:

“Hmei ƀuh snei, čiăng dưi mâo boh tŭ msĕ snăn snăn bruă klam mơ̆ng phung khua kiă kriê klei đăo, khua mduôn jing yuôm bhăn snăk. Hmei tĭng dlăng hlăm wưng êgao, bruă klam mơ̆ng phung khua kiă kriê klei đăo, khua mduôn jing jih ai tiê sĭt êmĭt... Hlăm wưng kơ anăp, să ăt srăng lŏ dơ̆ng mđĭ lar bruă klam anei mơ̆ng phung khua kiă kriê klei đăo leh anăn khua mduôn, čiăng si bĕ ngă čiăng ba phung khua kiă kriê klei đăo leh anăn khua mduôn jing dŭm mta phŭn, dŭm pô hâo hưn ti krah êpul êya, đru kơ mnuih ƀuôn sang ƀrư̆ hruê ƀrư̆ hluê ngă jăk bruă klam pô hŏng klei jing sa čô mnuih ƀuôn sang hur har mơ̆ng să Sơn Điền”.

Kluôm čar Lâm Đồng ară anei mâo giăm 900 čô mâo kơhưm hlăm krĭng mnuih djuê ƀiă. Giăm mnuih ƀuôn sang, thâo săng klei bhiăn leh anăn mâo êpul êya đăo knang, diñu jing kdrông mkŏ plah wah gưl bruă Đảng, bruă sang čư̆ êa hŏng mnuih ƀuôn sang, đru mtrŭt mjhar mnuih ƀuôn sang mđĭ kyar bruă duh mkra, kriê pioh knhuah dhar kreh, bi kjăp klei bi mguôp.