Hlue si Anôk bruă gĭt gai lĭng kahan să Đặng Thùy Trâm, knuă druh, lĭng kahan leh anăn bi ala khua gĭt gai alŭ wăl mkŏ mjing tui duah ti krĭng wăl Sang êa drao Đức Phổ ƀuh 2 klang kleh kahan djiê êngiă hŏng lu mta mnơ̆ng. Mnơ̆ng ƀuh leh mâo mnal đŭng, klei ksu, ao, pui pit leh anăn dhŏng bring jiă leh. Klang kleh dưi ba jao kơ Adŭ bruă dhar kreh – ala ƀuôn să  Đặng Thùy Trâm kriê dlăng hlue si hdră kčah.

Êbeh 6 mlan ngă “Hdră bruă 500 hruê mlam mđĭ ktang tui duah, bi klin leh anăn bi mklă anăn klang kleh kahan djiê êngiă” čar Quảng Ngãi bi leh bruă hrui mă mta ksiêm mkă dlăng hŏng 13.514 boh msat kahan djiê êngiă ka bi mklă anăn, hnưm hĭn hdră kčah mơ̆ng čar 45 hruê leh anăn hdră kčah gưl dlông 5 mlan. Mbĭt anăn, hrui mă mâo 4.929 mta ADN găp djuê kahan djiê êngiă, mâo êbeh 80%.