Ti kđông kahan ƀăng jang knông lăn Lệ Thanh, gru hmô “Grăp hruê kăm đru sa gŏ sang ƀun ti alŭ wăl knông lăn” dưi pŏk ngă hŏng 52 čô đảng viên klam 132 gŏ sang mnuih ƀuôn sang, lu jing gŏ sang dleh dlan. Lĭng kahan đru hruê ai, mtô kơ mnuih ƀuôn sang kriê dlăng ana pla mjing, mkra wĭt đang pla mjing, mđĭ boh tŭ dưn klei mkra mjing. Amai Hi Kri, mnuih djuê ana H’Rê ti ƀuôn Bi, să Ia Dom, čar Gia Lai , jing sa hlăm phung mâo lĭng kahan knông lăn đru. Klei hrăm mbĭt, klei mtô jih ai tiê mơ̆ng phung lĭng kahan đru kơ gŏ sang amai Hi Kri mâo thiăm klei găl bi hơĭt bruă mkra mjing leh anăn klei hdĭp.

“Hơ̆k mơak êdi, dôk mbĭt hŏng phung lĭng kahan mơak êdi. Ti krĭng knông lăn gŏ sang dôk giăm hŏng lĭng kahan, lĭng kahan đru gŏ sang lu sơnăk. Gŏ sang kâo lač jăk lu sơnăk.”

Amâo djŏ knŏng hrăm mbĭt hŏng mnuih ƀuôn sang hlăm klei mă bruă knuă, mkra mjing, lĭng kahan kđông kahan ƀăng jang knông lăn Lệ Thanh lŏ uêñ mĭn kriê dlăng dŭm gŏ sang Knŭk kna dlăng ba, phung mâo bruă tŭ dưn hŏng cách mạng. Grăm mlan, anôk bruă ngă klei čuă êmuh, mđup brei mnơ̆ng, mkă dlăngk lei suaih pral leh anăn mbha êa drao amâo mâo mă prăk kơ dŭm gŏ sang Knŭk kna dlăng ba ti alŭ wăl. Dŭm bruă ngă klei khăp đru kriê dlăng klei hdĭp, bi êdah bruă klam mơ̆ng phung lĭng kahan hŏng phung tuôm duh myơr, săn asei kyua bruă răng mgang Lăn čar. Kahan êka 4/4 Rơ Chăm Nich, ti ƀuôn Mooc Đen, să Ia Dom, ƀuh klă klei bi mguôp anăn hŏng dŭm gưl mâo lĭng kahan êmuh hrăm, đru êjai êngoh duam leh anăn dŭm wưng hruê knăm, tết:

“Êngoh duam tơdah amâo mâo hmao nao sang êa drao pô srăng nao ti sang êa drao ƀuôn Bi mơ̆ng lĭng kahan knông lăn. Lač sĭt ayŏng adei lĭng kahan knông lăn hruê knăm, hruê tết kreh hriê čuă gŏ sang, mđup brei mnơ̆ng. Ayŏng adei ti alŭ wăl sơnăn yơh, grăp čô khăp, čiăng sơăi.”

Mơ̆ng dŭm bruă ngă klă klơ̆ng hlăm bruă kriê dlăng klei hdĭp, bruă čung ba mnuih ƀuôn sang lŏ đru mđĭ klei bi mguôp plah wah mnuih ƀuôn sang hŏng êpul ngă bruă klam răng mgang knông lăn. Đại úy Trần Tuấn Linh, khua bruă kđi čar kđông kahan knông lăn Lệ Thanh brei thâo, anôk bruă pŏk ngă lu mta bruă mđi kơ nah gŭ msĕ si rŭ mdơ̆ng sang klei khăp, sang bi mguôp, čuă êmuh gŏ sang Knŭk kna dlăng ba, đru ngăn prăk leh anăn hdră mnêč mđĭ kyar bruă duh mkra. Hluê anăn, mnuih ƀuôn sang mâo thiăm klei găl bi hơĭt klei hdĭp, mbĭt anăn mđĭ klei thâo săng, bruă klam hlăm klei bi mguôp răng mgang klei êđăp ênang ti alŭ wăl.

“Hŏng dŭm gru hmô đru kơ mnuih ƀuôn sang mđĭ kyar bruă duh mkra, mnuih ƀuôn sang alŭ wăl knông lăn ăt mâo klei đăo knang hŏng lĭng kahan knông lăn. Boh nik mbĭt hŏng lĭng kahan knông lăn msĕ si sa kmeh gơ̆ng hdĭp, mă bruă knuă, mkra mjing, găn êrô ti alŭ wăl knông lăn bi mguôp hŏng lĭng kahan knông lăn, êpul bruă djŏ tuôm ti alŭ wăl mơ̆ng ƀăng jang knông lăn rơ̆ng kơ klei êđăp ênang yang ƀuôn.”

Ktuê êlan knông lăn čar Gia Lai, bruă kriê dlăng klei hdĭp mnuih ƀuôn sang nao mbĭt nanao hŏng bruă klam mtrŭt mjhar mnuih ƀuôn sang răng mgang êlan knông lăn, gơ̆ng knông lăn. Ti kđông kahan knông lăn Ia Puč, knuă druh, lĭng kahan jêñ jêñ mbĭt hŏng alŭ wăl, bi mguôp hŏng bruă Đảng nah gŭ, Bruă sang čư̆ êa leh anăn phung mâo kơhưm hâo hưn, mtrŭt mjhar mnuih ƀuôn sang mđĭ hĭn klei răng, čŏng pô nao hgŭm răng mgang klei êđăp ênang. Trung tá Nguyễn Đăng Dũng, Êpul mtrŭt mjhar mnuih ƀuôn sang, kđông kahan Knông lăn Ia Puch, brei thâo:

“Bruă grăp hruê kreh jêñ jêñ nao čiăng thâo klă, 3 kjăp 4 mbĭt hŏng mnuih ƀuôn sang, leh anăn đru kčĕ kơ khua mduôn, khua ƀuôn hmăng hmưi mnuih ƀuôn sang hrăm mbĭt hŏng gưl bruă Đảng nah gŭ, Bruă sang čư̆ êa alŭ wăl leh anăn lĭng kahan knông lăn jing răng mgang klei êđăp ênang. Êngao kơnăn ăt mtrŭt mjhar, hâo hưn kơ mnuih ƀuôn sang mđĭ kyar bruă mkra mjing.”

Mbĭt hŏng bruă jĕ giăm hŏng mnuih ƀuôn sang, thâo klă alŭ wăl, dŭm hdră msĕ si “Đru adei nao sang hră”, “Anak rông kđông kahan knông lăn”, “Sang hơuh mđao knông lăn” leh anăn bruă čuă êmuh, đru kơ mnuih ƀuôn sang wưng knăm mơak, Tết lŏ đru đru hluê ngă hdră êlan bi hơĭt klei hdĭp yang ƀuôn, kriê dlăng phung mda asei leh anăn dŭm gŏ sang adôk dleh dlan. Siu H’Ler, khua dlăng bruă Đảng nah gŭ, khua Êpul gơ̆ng bruă ƀuôn sang să Ia Puch mñă klă, klei mjĕ giăm plah wah lĭng kahan hŏng gưl bruă Đảng nah gŭ, Bruă sang čư̆ êa leh anăn mnuih ƀuôn sang ƀrư̆ hruê ƀrư̆ dưi bi kjăp, mkŏ mjing ai ktang hlăm mđĭ kyar bruă duh mkra - ala ƀuôn nao mbĭt hŏng răng mgang knông lăn.   

“Phung hlăm êpul răng mgang knông lăn kreh čŏng bi mguôp mâo dŭm klei kčĕ kơ gưl bruă Đảng nah gŭ, pŏk ngă dŭm bruă klam djŏ tuôm hŏng răng mgang klei êđăp ênang nah êngao knông lăn. Mbĭt anăn đru kơ mnuih ƀuôn sang msir lăm klei ƀun ƀun, mkŏ mkra krĭng ƀuôn sang mrâo, bi mguôp hŏng dŭm êpul gak răng, răng mgang klei êđăp ênang knông lăn ala čar.”

Boh sĭt ti dŭm alŭ wăl knông lăn brei ƀuh, răng mgang klei dưi kiă kriê, klei êđăp ênang ala čar amâo djŏ knŏng kang kơ bruă gak răng, ksiêm dlăng ƀiădah čiăng mâo klei hrăm mbĭt sa ai mơ̆ng mnuih ƀuôn sang. Êjai mnuih ƀuôn sang đăo knang, čŏng bi mguôp hŏng êpul bruă djŏ tuôm, ai răng mgang hlăm jih jang mnuih ƀuôn sang dưi bi kjăp mơ̆ng nah gŭ. Đại tá Đoàn Ngọc Báu, Khua bruă kđi čar knơ̆ng gĭt gai lĭng kahan knông lăn čar Gia Lai brei thâo, anei jing tur knơ̆ng brei dŭm alŭ wăl krĭng knông lăn krơ̆ng kjăp klei hơĭt ênang, mkŏ mjing klei găl mđĭ kyar bruă mkram jing leh anăn mđĭ hnơ̆ng klei hdĭp mnuih ƀuôn sang dŭm ƀuôn êlan.

“Hluê ngă dŭm hdră êlan thâo klă alŭ wăl, leh anăn thâo klă grăp čô čiăng mprăp răng mgang klei êđăp ênang ti alŭ wăl, mbĭt anăn mđĭ kyar bruă rông mnơ̆ng, pla mjing čiăng đru kơ mnuih ƀuôn sang mđĭ kyar bruă duh mkra ala ƀuôn”.

Krơ̆ng kjăp klei dưi kiă kriê, klei êđăp ênang knông lăn leh anăn kriê dlăng klei hdĭp mnuih ƀuôn sang jing dua bruă klam bi mguôp kjăp. Mơ̆ng dŭm hruê ai đru kơ mnuih ƀuôn sang, klei kah mbha hŏng dŭm gŏ sang Knŭk kna dlăng ba truh kơ bruă mtrŭt mjhar mnuih ƀuôn sang nao hgŭm răng mgang êlan knông lăn, gơ̆ng knông lăn, lĭng kahan knông lăn čar Gia Lai dôk đru mguôp bi kjăp ai răng mgang hlăm jih jang mnuih ƀuôn sang, mkŏ mjing krĭng knông lăn êđăp ênang, hơĭt kjăp. Êjai klei hdĭp ƀrư̆ hruê dưi kriê dlăng, klei đăo knang leh anăn bruă klam mơ̆ng mnuih ƀuôn sang hŏng bruă klam răng mgang knông lăn ăt dưi ksul mbŭ, mkŏ mjing tur knơ̆ng čiăng kơ krĭng knông lăn Gia Lai đĭ kyar hơĭt kjăp.