Krah mlan 10, amai Bàn Mùi Diết, mnuih djuê ana Dao, ti alŭ 12, să knông lăn Ia Rvê, nao mơ̆ng ưm ti anôk bruă sang čư̆ êa să čiăng nao mplĕ hră tŭ mă lăn dôk. Ung ñu nao mă bruă ti ala tač êngao, ñu dôk ti sang kriê dlăng dua čô anak điêt. Sang gŏ sang dôk mâo mdơ̆ng êjai ti lăn mơ̆ng amĭ ama. Klei hdĭp lu jing pla djam, rông mnŭ, hnư hrui wĭt amâo hơĭt. Kyua anăn, bruă dưi tŭ mă lăn dôk amâo dưi mdăp ôh klei mơak.

“Kâo mơak êdi, êjai mâo knŭk kna mkăp brei lăn dôk, lăn pla mjing msĕ snei kâo mơak êdi leh anăn hdơr knga kơ knŭk kna lu snăk”.

Mbĭt hŏng klei hơ̆k mơak anăn, Đặng Tòn San, ti alŭ 13, mâo leh giăm 10 thŭn hdĭp mda ti knông lăn Ia Rvê ƀiădah gŏ sang ăt ka mâo lăn dôk, lăn pla mjing. Čiăng bi hơĭt klei hdĭp, San nao mă bruă mưn, mă bruă mưn hlăm djăp anôk. Tơdah Knŭk kna pŏk ngă hdră mtrŭn đru lăn ala, San čang hmăng grăp hruê dưi mă lăn, mơ̆ng anăn, mâo klei găl ngă bruă knuă hơĭt ti alŭ wăl.

“Êlâo dih pô amâo mâo lăn, ară anei knŭk kna đru lăn kơ mnuih ƀuôn sang, lač jăk êdi, êlâo dih pô nao mă bruă mưn, ară anei mâo lăn leh snăn mă bruă duh mkra ti anei yơh.”

Hŏng dŭm gŏ sang msĕ si amai Diết, San, lăn dôk jing klei găl čiăng bi hơĭt anôk dôk; lăn pla mjing jing tur knơ̆ng čiăng ƀrư̆ ƀrư̆ čŏng pô hlăm klei hdĭp, bi hrŏ klei jưh knang kơ bruă mă mưn hlăm yan. Hluê si klei ksiêm dlăng mơ̆ng să knông lăn Ia Rvê, kluôm să mâo 155 gŏ sang čiăng dưi đru kơ lăn ala lehanăn hră mơar kơ lăn ala. Hlăm anăn, 92 gŏ sang kƀah lăn dôk, lăn pla mjing; 6 gŏ sang mâo leh lăn pla mjing ƀiădah ka mâo lăn dôk, mbĭt hŏng lu gŏ sang čiăng đru bi leh hră mơar kơ klei dưi djă yua lăn.

Hluê ngă Hdră mtrŭn mrô 104 mơ̆ng Khua knŭk kna kơ hdră mđĭ kyar bruă duh mkra - ala ƀuôn mguôp hŏng răng mgang klei êđăp ênang, lĭng kahan ti alŭ wăl Lăn Dap Kngư leh anăn Hdră mtrŭn mrô 28 mơ̆ng Êpul gơ̆ng bruă ƀuôn sang čar Dak Lak kơ hdră đru lăn ala hŏng mnuih djuê ƀiă, să Ia Rvê mkŏ mjing hdră mkăp lăn djŏ guôp hŏng klei čiăng sĭt.

Krĭng lăn dôk dưi čuăl mkă mâo boh prŏng giăm 8 ha, ktuê êlan dơ̆ng mơ̆ng alŭ 8 truh kơ alŭ 10, mbha jing 198 anôk. Hluê si hdră kčah, grăp gŏ sang dưi mkăp 400 m², mâo 200 m² lăn dôk leh anăn 200 m² lăn pla mjing grăp thŭn.

Êlâo kơ pŏk ngă, anăn dŭm gŏ êsei dưi dưn, hră kak lăn čuăl mkă klă klơ̆ng leh anăn dŭm klei kčah mtrŭn djŏ tuôm dưi hưn mdah klă mngač hlăm 15 hruê ti anôk bruă sang čư̆ êa să. Êpul čŏng kriê dlăng dŭm alŭ ăt klă anăp hưn mthâo čiăng kơ mnuih ƀuôn sang thâo, nao hgŭm đru mguôp klei blŭ. Gưl mplĕ hră krah mlan 10 kơ 28 gŏ êsei ka mâo lăn dôk, dưi mkŏ mjing klă mngač hŏng klei ktuê dlăng mơ̆ng bruă sang čư̆ êa, Mặt trận čar kwar leh anăn mnuih ƀuôn sang.

Nông Văn Gióng, Khua alŭ 4, să Ia Rvê, brei thâo hlăm gưl tal êlâo hluê ngă Hdră bruă 104, alŭ mâo 6 gŏ sang dưi tŭ mă lăn. Anei jing dŭm gŏ sang mâo klei hdĭp dleh dlan êdi, hdĭp mda ti alŭ wăl lu thŭn ƀiădah ka mâo lăn pioh ngă bruă leh anăn hơĭt anôk dôk.

"Mâo klei mđing dlăng mơ̆ng Đảng leh anăn Knŭk kna 6 gŏ êsei mnuih ƀuôn sang anei mâo knŭk kna mkăp lăn anei snăn mnuih ƀuôn sang hơ̆k mơak êdi. Ară anei hriê mă lăn ti anôk klă sĭt, 6 gŏ êsei hlăm alŭ wăl ƀuôn sang kâo kgŭ mơ̆ng ưm leh anăn nao lu êdi".

Mâo lăn dôk mrâo knŏng msir mghaih sa kdrêč klei dleh dlan. Čiăng kơ mnuih ƀuôn sang klă sĭt hơĭt klei hdĭp, mâo klei găl kpưn đĭ tlaih kơ ƀun, să Ia Rvê dôk bi leh hră mơar mkăp brei 266 ha lăn pla mjing ti dŭm alŭ 7, 12 leh anăn 13. Hluê si hdră kčah mơ̆ng alŭ wăl, grăp gŏ êsei mĭn tĭng dưi mkăp brei 1 ha. Mbĭt hŏng lăn pla mjing, să srăng pŏk ngă dŭm hdră msir đru brei prăk čan hŏng ênoh prăk mnga hdjul, ktrâo lač kơ hdră mnêč, ruah ana pla mjing, mnơ̆ng rông djŏ guôp hŏng klei găl yan adiê leh anăn klei dưi pla mjing mơ̆ng grăp gŏ êsei.

Nguyễn Huy Tiến, Khua bruă Đảng să Ia Rvê, brei thâo alŭ wăl srăng lŏ dơ̆ng ksiêm dlăng mnuih, ênoh lăn leh anăn mtrŭt mđĭ bruă hluê ngă hdră mtrŭn, mbĭt anăn mguôp đru lăn ala hŏng hdră msir mjing hdră duh ƀơ̆ng kơ mnuih ƀuôn sang.

"Hlăm wưng kơ anăp bruă Đảng, bruă sang čư̆ êa să lŏ dơ̆ng gĭt gai adŭ bruă duh mkra lŏ dơ̆ng ksiêm dlăng čiăng ngă bruă mkăp brei lăn dôk leh anăn lăn pla mjing, čiăng đru kơ mnuih ƀuôn sang mâo mnơ̆ng yua pioh duh kơ bruă pla mjing, đru bi hơĭt klei hdĭp mda hlăm krĭng knông lăn să Ia Rvê. Mbĭt hŏng mkăp brei lăn, să ăt mâo dŭm hdră êlan čiăng pŏk ngă dŭm hdră êlan duh ƀơ̆ng, bi mlih bruă mă čiăng kơ mnuih ƀuôn sang hơĭt klei hdĭp mda, siă suôr sui thŭn mlan hlăm krĭng knông lăn."

Mơ̆ng dŭm kdrêč lăn tal êlâo truh kơ hdră mkăp lăn pla mjing, hdră đru lăn ala ti Ia Rvê ƀrư̆ ƀrư̆ mđing truh kơ klei čiăng klă sĭt mơ̆ng mnuih ƀuôn sang djuê ana ƀiă. Klei tŭ dưn mơ̆ng hdră amâo djŏ knŏng dôk ti ênoh gŏ êsei dưi jao lăn, ƀiădah lŏ dôk ti klei dưi đru kơ mnuih ƀuôn sang mâo sang dôk hơĭt kjăp, mâo kdrăp mă bruă leh anăn mjing hnư hrui wĭt sui thŭn. Anei ăt jing klei găl yuôm bhăn čiăng kơ mnuih ƀuôn sang hơĭt ai tiê ngă bruă, siă suôr hŏng krĭng knông lăn, đru mđĭ kyar bruă duh mkra - ala ƀuôn leh anăn krơ̆ng kjăp klei êđăp ênang ti alŭ wăl.