Mơ̆ng hruê 1/11/2025 truh ară anei, êpul bruă djŏ tuôm čar Gia Lai ksiêm dlăng, tui duah ti 37 krĭng wăl êngao ala čar, bi klin mâo 85 klang kahan djiê êngiă. Čar ăt mâo mă êbeh 3.100 mta ksiêm dlăng găp djuê; tui duah, kuai mă mta êbeh 12 000 klang kleh kahan djiê êngiă ti dŭm wăl msat, hrui mă 7.800 mta djăp klei găl bi mklă ADN. Đại tá Võ Tấn Tài – Khua bruă Đảng knơ̆ng gĭt gai lĭng kahan čar, K’iăng khua êpul gĭt gai 515 čar Gia Lai tĭng dlăng, klei bi mguôp plah wah dŭm êpul leh anăn bruă sang čư̆ êa dŭm gưl hlăm čar đru bi leh jăk bruă klam mơ̆ng Wưng tal 1. Čhuang hlăm wưng tal 2 Hdră 500 hruê mlam tui duah, bi kƀĭn leh anăn bi mklă klang phung êngiă asei, dŭm êpul lŏ dơ̆ng gĭr ktưn:

“Hruê mmông kơ anăp snăn Anôk bruă gĭt gai lŏ dơ̆ng kčĕ kơ Khua gĭt gai, Anôk dlăng bruă Đảng gĭt gai dŭm knơ̆ng, dhar bruă mâo klei bi mguôp, ngă bruă ktang phĭt leh anăn bi mguôp bruă klam 6 klă hŏng dŭm knơ̆ng, dhar bruă hluê djŏ bruă klam. Hŏng jih jang dŭm alŭ wăl leh mâo klei bi kƀĭn, mă klei hriăm kơ grăp să, ƀuôn hgŭm snăn brei ktang phĭt hĭn, boh nik jing mđĭ lar bruă klam mơ̆ng Mnuih ƀuôn sang ăt msĕ mơh dŭm klei hriăm mâo phung ngă bruă ksiêm duah, bi mklă anăn phung kahan djiê êngiă leh anăn bi kƀĭn ară anei čiăng si srăng ngă drei dưi mjing gru kruăk leh anăn dưi mâo ênoh čuăn mâo Anôk bruă gĭt gai ala čar jao kơ čar Gia Lai.”

Mŭt hlăm thŭn 2027, Anôk bruă gĭt gai 515 čar Gia Lai srăng kƀĭn jih ai tiê kơ wưng tal 2 hŏng dŭm mta kñăm phŭn: bi leh 100% hnơ̆ng čuăn bi kƀĭn mơ̆ng Kahan krĭng 5 jao; bi leh mă mta dŭm msat phung kahan djiê êngiă mâo sa kdrêč klei hâo hưn; ksiêm dlăng, mkŏ mjing klei hâo hưn 100% phung kahan djiê êngiă ka klă klei hâo hưn leh anăn mă mta ADN găp djuê amĭ čiăng mkă dlăng hlăm Anôk bruă ala čar. Klă klơ̆ng pŏk ngă bruă klam ti anôk phŭn, Thượng tá Hoàng Viết Ngọc - Khua bruă kđi čar êpul K52 mđĭ lar klei gĭr ngă bruă:

“Wưng knhal tuič hdră bruă hmei srăng mđĭ pral hluê ngă bruă tui duah wăt hlăm ala čar leh anăn ala tač êngao. Hmei mtrŭt mjhar kơ jih jang phung knuă druh, lĭng kahan mđĭ lar ai tiê đua klam, bi mklă bruă klam, amâo uêñ hruê mlam, gĭr hgao jih klei dleh dlan čiăng bi leh jăk dŭm bruă klam mâo kčah jao.”

Ƀri gưl anei, 14 êpul leh anăn 32 čô mâo klei kdlưn hĭn hlăm bruă tui duah, bi kƀĭn lehanăn bi mklă anăn phung lĭng kahan djiê êngiă dưi tŭ mă Hră pah mni mơ̆ng Khua knơ̆ng bruă sang čư̆ êa čar Gia Lai.