Lu thŭn hŏng anei, pô thâo mbruă Phạm Văn Rôm ti să Ba Vinh, čar Quảng Ngãi jih ai tiê mtô bi hriăm klei tông čing Ba kơ phung mda asei mnuih H'rê. Ñu brei thâo, anei jing kdrăp tông ayŭ yuôm bhăn hĭn êdi mơ̆ng mnuih H'rê, jiă knhuah dhar kreh, jing klei bi knăl kơ klei mdrŏng sah leh anăn kơhưm mơ̆ng pô sang hlăm êpul êya:

"Tal êlâo jing drei kriê pioh lehanăn răng mgang dhar kreh mơ̆ng mnuih ƀuôn sang H'rê drei. Tal dua, klei tông Čing Ba mâo mơ̆ng đưm leh, kyuanăn Čing Ba mơ̆ng mnuih H'rê mâo ênoh yuôm êdi, brei drei kriê pioh ênoh yuôm knhuah gru mơ̆ng mnuih ƀuôn sang H'rê".

Klei tông Čing Ba mơ̆ng mnuih H'rê dưi tŭ yap jing Knhuah gru dhar kreh amâo êdah klă ala čar.  Trần Thị Thanh Thúy, Kiăng khua anôk bruă sang čư̆ êa să Ba Vinh brei thâo, alŭ wăl pŏk ngă leh hdră kriê pioh, mđĭ lar boh tŭ yuôm knhuah gru anei hlăm hdră hiu čhưn ênguê.

Truh ară anei, să mkŏ mjing leh 4 êpul dhar kreh – kdŏ mmuñ ti 4 alŭ leh anăn dôk lŏ dơ̆ng  mkŏ mjing hdră bruă răng kriê leh anăn mđĭ lar ênoh yuôm Čing Ba hŏng dŭm ênhiang kdŏ djuê ana mơ̆ng phung mniê Hrê. Să pŏk  leh lu adŭ dhar kreh mtô Čing  Ba leh anăn bruă mñam djuê ana, čiăng kriê pioh ênoh yuôm dhar kreh djuê ana mnuih Hrê, đru mđĭ kyar hiu čhưn ênguê êpul êya, mjing hdră duh ƀơ̆ng kơ mnuih ƀuôn sang:

“Anei jing dŭm bruă ngă mâo đru mơ̆ng Hdră kñăm ala čar leh anăn srăng lŏ dơ̆ng bi lar leh anăn mjing mnơ̆ng dhơ̆ng kơ mnuih ƀuôn sang êdei anăp. Alŭ wăl čang hmăng srăng bi mguôp jih dŭm hdră bruă čiăng bi liê mjing mnơ̆ng dhơ̆ng phŭn kơ mnuih ƀuôn sang mơ̆ng dŭm adŭ bruă mtô bi hriăm snei.”

Mơ̆ng hdră ala čar kñăm, lu boh tŭ yuôm dhar kreh djuê ana mơ̆ng đưm mơ̆ng mnuih djuê ana Cor ăt dôk dưi kriê pioh leh anăn mđĭ lar. Ti dŭm să krĭng čư̆ čhiăng čar Quảng Ngãi, dŭm mta klei kdŏ mmuñ msĕ si bi lông tông čing, kdŏ Cà đáo, mdơ̆ng gơ̆ng ngă yang mbĭt hŏng dŭm knăm mơak djuê ana dưi lŏ kơrŭ wĭt, mtô kơ phung mda asei.

 Lu thŭn anei, pô mbruă yang ƀuôn Hồ Ngọc An ti să čư̆ čhiăng Trà Bồng gĭr hŏng bruă mtô kơ dhar kreh Cor hlăm  sang hră. Ñu mơak tơdah ƀrư̆ hruê mâo lu phung hđeh khăp kơ dhar kreh djuê ana.

“Lač jing ktưn hưn êdi tơdah dưi ngă kơ djuê ana pô, kriê pioh lehanăn răng mgang. Asei kâo pô ăt jing mnuih klă anăp mtô kơ phung hđeh msĕ si sang hră knŭk kna čiêm rông hđeh mnuih djuê ƀiă Trà Bồng snăn kâo ƀuh mơak êdi. Grăp knăm mơak Ngả Rạ mơ̆ng dŭm sang hră diñu mkŏ mjing mâo knhuah dhar kreh mơ̆ng mnuih ƀuôn sang Cor".

Bi mklă dhar kreh jing tur knơ̆ng čiăng mđĭ kyar hiu čhưn ênguê kjăp, dŭm alŭ wăl krĭng čư̆ čhiăng čar Quảng Ngãi mguôp hŏng kriê pioh knhuah gru hŏng mđĭ kyar hiu čhưn ênguê êpul êya, grăp knhuang mjing hdră duh ƀơ̆ng kơ mnuih ƀuôn sang. Đỗ Khắc Phi,  K’iăng Khua Knơ̆ng bruă sang čư̆ êa să Trà Bồng, bi mklă:

“Mơ̆ng phŭn mkăp prăk Hdră bruă 6 mơ̆ng Hdră kñăm ala čar mđĭ kyar bruă duh mkra ala ƀuôn krĭng mnuih djuê ƀiă, Knơ̆ng bruă sang čư̆ êa să mđing đru čiăng duh bi liê ăt msĕ mơh hluê ngă jăk bruă kriê pioh dŭm knhuah gru dhar kreh ti alŭ wăl. Boh nik jing mtô bi hriăm dŭm knhuah gru dhar kreh; blei mprăp đru kdrăp mnơ̆ng ăt msĕ mơh duh bi liê anôk bruă dhar kreh kơ dŭm alŭ. Wưng kơ anăp, hmei lŏ dơ̆ng mđing ai dưi mơ̆ng dŭm hdră bruă, čiăng mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng".