VOV4.Êđê - Knŏng adôk dŭm hruê, êbeh 69 êklăk čô mnuih kluôm ala srăng ngă klei dưi kđi čar leh anăn yuôm bhăn hĭn mơ̆ng mnuih ƀuôn sang: nao mplĕ hră ruah pô bi ala êdeh kdlưn hlăm Quôc hội leh anăn Hội đồng nhân dân dŭm gưl. Kyua hmaĭ mơ̆ng klei ruă Covid-19, truh ară anei dŭm alŭ wăl yap leh hdră mkŏ mjing klei mplĕ hră hlăm boh klei ruă tưp. Hdră kñăm jing jih jang mnuih dưi nao hlăm “Hruê mơak ala čar” leh anăn ngă klei dưi ruah khua.

89 anôk mplĕ hră ti alŭ wăl Cầu Giấy, ƀuôn prŏng Hà Nội truh kơ ară anei dưi mprăp djăp ênŭm leh, rơ̆ng klei êđăp ênang hlăm hdră gang mkhư̆ klei ruă. Ti dŭm anôk mplĕ hră mâo mjing êlan nao mngač tač lehanăn mâo klei ktrâo lač klă klơ̆ng kơ mnuih ƀuôn sang nao mplĕ hră, rơ̆ng dôk bi kbưi hlăk nao mă hră, čih hlăm hră lehanăn mplĕ hră; truă čhiăm guôm ƀô̆, hluê ngă hdră rao kngan, yua êa rao bi mdjiê kman êlâo, hlăm lehanăn êdei kơ mplĕ hră... Aduôn Trần Thị Phương Hoa, Khua bruă Đảng alŭ wăl, Khua anôk bruă gĭt gai hdră ruah khua alŭ Cầu Giấy brei thâo, êngao kơ bruă rơ̆ng kjăp klei kčah mtrŭn hlăm hdră gang mkhư̆ klei ruă tưp hlăm hdră mplĕ hră, alŭ ăt mprăp kơ hdră ngă bruă klă klơ̆ng tơ tăm mâo mnuih ruă: “Hdră kčah gang mkhư̆ klei ruă tưp hlăm gưl ruah khua dưi mđĭ sa hnơ̆ng dơ̆ng. Ară anei dŭm krĭng ruah khua mâo s’aĭ adŭ bi ktlah. Êpul ruah khua mâo mjuăt bi hriăm, êngao kơ bruă mjuăt bi hriăm thơ̆ng kơ bruă snăn anôk bruă mdrao mgŭn alŭ mâo klei đua klam mjuăt bi hriăm kơ mnuih hlăm êpul ruah khua mâo klei thâo hĭn hlăm hdră gang mkhư̆ klei ruă tưp čiăng ktrâo lač kơ mnuih ƀuôn sang tơ digơ̆ nao ruah khua rơ̆ng kjăp klei êđăp ênang hlăm hdră gang mkhư̆ klei ruă tưp.

Ti jih jang alŭ hlăm ƀuôn prŏng Hà Nội mâo leh hdră gang mkhư̆ klei ruă tưp ti anôk ruah khua lehanăn mâo hdră ngă bruă hŏng dŭm anôk bi ktlah, anôk kwang dar. Dhar bruă ruah khua ƀuôn prŏng Hà Nội hưn mdah leh hŏng Êpul hgŭm ruah khua ala čar kơ hdră mkŏ mjing klei mplĕ hră ti dŭm anôk bi ktlah.

Bi ti ƀuôn prŏng Hồ Chí Minh, Dhar bruă ruah khua ƀuôn prŏng mtă brei mkŏ dăp anôk dôk rơ̆ng hnơ̆ng bi kpleh, dôk kbưi hŏng pô mkăn, bi hrŏ klei bi kƀĭn lu mnuih, mnuih dôk amâo êgao ôh 50% ênoh dưi dôk hlăm sang bi kƀĭn. Klei năng mđing, ti Bắc Giang, anôk dôk bluh mâo klei ruă Covid 19 lu êdi hlăm kluôm ala ară anei, tĭng amâo mkŏ mjing ôh knăm mphŭn pŏk hruê m’ak anei hlăm hruê ruah khua, ƀiădah srăng kah mbha êpul đ’điêt nao mplĕ hră hlăm lu gưl hluê mmông bi kčah, bi hrŏ klei bi kƀĭn lu mnuih. Ngô Sách Thực, K’iăng khua anôk bruă mặt trận čar kwar Việt Nam lač, hlăm wưng anei, dŭm alŭ wăl mkŏ mjing klei ruah khua êjai dôk mâo klei ruă Covid 19, snăn bruă bi mklă k’hưm, čih mkra, mƀlir anăn mnuih ƀuôn sang ti dŭm anôk bi ktlah, anôk mdrao mgŭn.. brei rơ̆ng kjăp klei êđăp ênang čiăng kơ mnuih ƀuôn sang ti krĭng anei hluê ngă hdră ruah khua mơ̆ng pô: “Tơdah mâo klei ruă amâo dah mâo boh klei mjêč, hmei srăng mâo hdră ngă bruă klă klơ̆ng, čiăng kơ dŭm anôk bi ktlah dưi mkŏ mjing huôm mplĕ hră mbĕ hiu. Ăt hlăm sa êpul mplĕ hră, sa krĭng wăl mplĕ hră mơ̆ng mnuih ƀuôn sang dŭm alŭ wăl snăn bruă ba yua huôm mplĕ hră mbĕ hiu si srăng ngă čiăng dưi rơ̆ng kjăp hdră gang mkhư̆ klei ruă êjai lehanăn hluê ngă klei dưi mplĕ hră ti dŭm krĭng bi ktlah.

Ti krĭng lăn dap kngư, ai êwa hruê ruah khua hlăk mjhĭt m’uăt. Adei H Sinh Bkrông, sinh viên thŭn tal 2, dôk hriăm Đại học Tây Nguyên, čar Dak Lak brei thâo, anei jing gưl tal êlâo kâo nao hlăm hruê m’ak ruah khua, kyua anăn kâo hơ̆k m’ak êdi, dôk guôn hruê dưi djă pŏk hră ti kngan, hluê ngă klei dưi lehanăn bruă klam mơ̆ng pô. H Sinh lač:“Anei jing gưl tal êlâo kâo nao mplĕ hră, kyua anăn kâo m’ak snăk dưi hluê ngă klei dưi mơ̆ng sa čô mnuih ƀuôn sang. Ti anăp kâo srăng ruah mnuih mâo klei thâo, đru mguôp hlăm hdră mtrŭt mđĭ kyar bruă duh mkra, ala ƀuôn ti alŭ wăl.

Bruă Đoàn čar Dak Lak mkŏ mjing leh lu hdră bruă kkuh m’ak ti dŭm kdriêk, wăl krah, ƀuôn prŏng hŏng klei nao hgŭm mơ̆ng dŭm êbâo čô đoàn viên, êdam êra hlăm čar. Hluê anăn, mkŏ mjing lu bruă ba anăp ti dŭm anôk mplĕ hră msĕ si: Đru kơ bruă răng mgang klei êđăp ênang, rơ̆ng klei doh siam ti wăl anôk mkŏ mjing klei ruah khua, hdră gang mkhư̆ klei ruă Covid 19, mkŏ mjing Hruê m’ak phung bi ala mda asei, Klei kƀĭn trông “Phung bi ala mda asei hŏng klei ruah pô bi ala Quốc hội gưl XV lehanăn bi ala HĐND dŭm gưl wung thŭn 2021-2026”.

Čiăng rơ̆ng klei êđăp ênang kơ jih jang mnuih nao hlăm Knăm m’ak mơ̆ng ala čar, dhar bruă ruah khua ala čar ba mdah leh klei ktrâo lač kơ klei ruah khua. Mrâo anei, Êpul hgŭm ruah khua ala čar mtă brei mđing kơ klei ruah khua brei tui hluê hŏng hnơ̆ng, ênoh mnuih ƀuôn sang ti grăp krĭng mplĕ hră lehanăn mtă brei mđing kơ hdră gang mkhư̆ klei ruă Covid 19 ti alŭ wăl. Hŏng phung mâo klei ruă Covid 19, Khua dhar bruă ksiêm dlăng hdră bhiăn mŏng Quốc hội Hoàng Thanh Tùng brei thâo: “Hdră bhiăn phŭn kčah mtrŭn grăp čô mnuih mâo s’aĭ klei dưi nao ruah khua, brei mâo anăn dưi nao ruah khua. Kyua anăn, mnuih mâo klei bi djŏ klei ruă dưi bi ktlah ti anôk bi ktlah amâo dah bi ktlah ti sang snăn knŭk kna ăt rŏng kơ pô anăn dưi nao ruah khua. Anei jing klei đua klam mŏng Anôk bruă sang čư̆ êa gưl să anôk mnuih ƀuôn sang anăn dôk, amao dah anôk bi ktlah rŏng hluê ngă djăp hdră msir dưi hluê ngă hdră ruah khua.

Ară anei, dŭm alŭ wăl hlăm kluôm ala dôk mprăp kơ hdră kčah mtô mblang truh kơ grăp gŏ sang, grăp čô mnuih kơ bruă rơ̆ng kjăp klei êđăp ênang, gang mkhư̆ klei ruă tưp tơ nao mplĕ hră lehanăn hdră mplĕ hră tơdah dôk hlăm anôk bi ktlah. Mta kñăm yuôm bhăn mâo mđing truh jing jih jang mnuih ƀuôn sang khă dôk ti anôk bi ktlah, dŏng mdrao Covid 19, phung nai aê mdrao, êpul dôk ngă bruă klam,,, dưi hluê ngă hdră ruah khua s’aĭ. Jih jang hdră dưi mkŏ mjing djŏ hdră bhiăn, rơ̆ng klei êđăp ênang hlăk dôk bluh mâo klei ruă Covid 19./.