VOV4.Êđê - Mơ̆ng gưl 3 mlan tal 2/2020 truh kơ ară anei, bruă ngă ba mnuih mă bruă nao mă bruă ti ala tač êngao jing bruă mâo klei hmăi kjham hĭng mơ̆ng klei ruă tưp Covid-19, dôk ti tluôn bruă êdeh phiơr, sang jưh lehanăn bruă hiu čhưn ênguê. Tui hluê anôk bruă ksiêm dlăng mnuih mă mă bruă ti ala čar tač êngao (phŭn mnuih mă bruă, kahan êka êkeh lehanăn yang ƀuôn), klei čih yap hưn mdah mơ̆ng dŭm knơ̆ng bruă brei thâo: hlăm 4 mlan leh êgao, ênoh mnuih ƀuôn sang Việt Nam nao mă bruă ti ala tač êngao mâo giăm 35.000 čô mnuih, dưi truh 38,79% mkă hŏng hdră êlan hlăm thŭn. Ala čar Nhật Bản tŭ drông lu mnuih mă bruă mơ̆ng Việt Nam hŏng ênoh giăm 18 êbâo 400 čô mnuih mă bruă, leh kơ anăn jing Đài Loan (Trung Quốc) hŏng ênoh êbeh 15.000 čô mnuih, Hàn Quốc mâo 280 čô mnuih, Hungary mâo êbeh 200 čô mnuih lehanăn dŭm anôk mkăn. Hlăm mlan 5 mâo êbeh 5 êbâo 300 čô mnuih Việt Nam nao mă bruă ti ala tač êngao, mâo klei đăo knăl bruă ba mnuih mă bruă mơ̆ng Việt Nam nao mă bruă ti ala čar tač êngao srăng lŏ mâo lu klei dleh dlan kyua klei ruă tưp Covid-19.