VOV4.Êđê- Hŏng ai êwa mtluk mtlak mơak mñai wỉ phă hrue lăn ala êa djuh, jih jang mnuih hlăm kluôm ala srăng djă ti kngan pô hră nao mplĕ čiang hrŏng ruah mnuih bi ala brei kơ pô ti Quốc hội, lehanăn HĐND dŭm gưl, Vương Đình Huệ, Khua Quốc hội, Khua kiă kriê êpul hgŭm ruah khua ala čar wĭt lač leh klei êmuh mơ̆ng bruă klei mrâo. Khua Quốc hội bi êdah klei čang hmăng, jih jang mnuih kluôm ala ksiêm dlăng bi nik kơ grăp čô mnuih mgơ̆ng ruah, hŏng klei klă mngač hrŏng ruah phung bi ala klă sĭt jing kdlưn hĭn, năng hĭn đru bi mđĭ hnơ̆ng kjăp, lehanăn klei tŭ jing jih jang bruă mơ̆ng anôk phung ƀuôn sang ruah, rŭ mdơ̆ng lăn čar Việt Nam kjăp ktang, bi leh jih jang mta kñăm yuôm bhăn mâo Đảng bi êdah leh halwm hdra mtrŭn mơ̆ng klei bi kƀĭn prŏng kluôm ala tal 13. Khua Quốc hộ lŏ mñă hrue 23/5 jing sa hrue yuôm bhăn kơ lăn čar, jing hrue jih jang mnuih hlăm kluôm ala klă sĭt hlue ngă klei dưi kơ pô, čŏng pô djă ti kngan mơar ruah khua pioh ruah mnuih bi ala kơ pô. Klei hrŏng ruah mơ̆ng grăp čô mnuih srăng bi klă hlei srăng jing pô bi ala Quốc hội, pô bi ala HĐND dŭm gưl, jing pô phŭn kruak hnơ̆ng kjăp, klei tŭ bruă ngă mơ̆ng anôk bruă phung ƀuôn sang ruah./.

Pô mblang: Y-Khem Niê