VOV4.Êđê-  Hrue anei, hrue 10/3 hlue si mlan ƀlĕ jing hrue ngă yang kơ mtao Hùng. Tui si Êpul mkŏ mjing knăm ngă yang kơ Mtao Hùng, knăm ngă yang thŭn 2021 jing thŭn hliê snăn čar Phú Thọ mkŏ mjing klei ngă yang. Mbĭt hŏng klei bhiăn mưng ngă leh, čiăng mđrĭng hŏng bruă gang mkhư̆ klei ruă tưp covid 19, kdrêč klei hlăp mbul knŏng srăng mâo dŭm bruă dhar kreh djuê ana mơ̆ng đưm.

Bi kdrêč ngă yang mâo klei ngă yang Quốc tổ Lạc Long Quân, lehanăn čuh brui mngưi kơ Tổ Mẫu Âu Cơ hlăm hrue 17/4 jing hrue 6/3 mlan ƀlĕ, knăm ngă yang kơ phung mtao Hùng, lehanăn knăm mđĭ bai mnga ti knưng bi hdơr kơ Awa Hô blŭ hrăm hŏng knuă druh, lĭng kahan Đại đoàn quân Tiên phong hrue 21/4 jing hrue 10/3 mlan ƀlĕ. Knăm čuh brui mngưi kơ phung mtao Hùng ti dŭm alŭ wăl hlăm čar mơ̆ng hrue 1 – 7/3 hlue mlan ƀlĕ. Kơ kdrêč hlăp mbul, wưng anei, hlăm anôk kreh mkŏ mjing, knŏng mkŏ mjing dŭm bruă dhar kreh mâo leh mơ̆ng đưm msĕ si tông hgơr kông, tăp kniêm, bi lông đŭn ƀêñ điŏ, tŭk riă ƀêñ čưng, lehanăn tlê ƀêñ dày./.

Pô mblang: Y-Khem Niê