VOV4.Êđê -  Mphŭn mơ̆ng hruê anei 15-3 truh jih hruê 31-12-2021, Kahan ksiêm hlăm êlan klông kluôm ala trŭn ngă bruă ksiêm dlăng, ktuê dlăng, đŭ bi kmhal hluê si akŏ “Phung mgăt êdeh hlăm ktuê êlan ƀiădah hlăm asei mlei mâo ma tŭi, mâo lu hnơ̆ng kôl” hluê si hdră kčah mơ̆ng Phŭn bruă kahan ksiêm. Hluê anăn, êpul kahan ksiêm hlăm êlan klông kƀĭn ksiêm dlăng hlăm dŭm ktuê êlan phŭn hlăm ƀuôn prŏng, dŭm ktuê êlan êran pral, êlan phŭn, dŭm ktuê êlan dŭ mdiăng phung tue, mnơ̆ng dhơ̆ng, dŭm ktuê êlan khăng mâo klei bi drăm hlăm êlan klông, alŭ wăl giăm kdrŭn êdeh, kdrŭn ksĭ, alŭ wăl sang ƀar, sang čhĭ mnơ̆ng ƀơ̆ng, alŭ wăl mâo klei rŭng răng, phung čhĭ yua ma tŭi. Hlăm anăn, kƀĭn hlăm phung mgăt êdeh p’phŭt, êdeh ô tô, êdeh mdiăng tuê, êdeh dŭ mdiăng, êdeh ô tô đoh rơmoc.

H’Zawut pô mblang