VOV4.Êđê -Aguah mbruê 19-3, Ti anôk bruă Knŭk kna, ti anôk bruă Knŭk kna, Dhar bruă gĭt gai ala čar gang mkhư̆ klei ruă Covid-19 kƀĭn bi trông kơ dŭm hdră msir čiăng dưi hluê ngă hră bi mklă leh tlŏ mgang hlăm êdei anăp, đru mjing klei găl drông mnuih Việt Nam mơ̆ng ala tač êngao wĭt kơ ala čar, hlăm anăn kčĕ hdră hâo hưn kơ klei tlŏ vaccine Covid-19 mnuih ƀuôn sang hlăm ênoh mrô mnuih ƀuôn sang ala čar. Hŏng mnuih ƀuôn sang hlăm ala čar, Phŭn bruă mdrao mgŭn brei thâo, srăng mkăp mrô QR code kơ grăp čô mnuih tlŏ leh vaccine Covid-19 leh anăn čih hlăm hră mơar kriê dlăng klei suaih pral čiăng djăp hră mơar tơdah čiăng bi mklă tlŏ leh vaccin tơdah nao ti ala tač êngao. Kơ bruă anei, K’iăng khua knŭk kna Vũ Đức Đam lač klă: Hdră msir mơ̆ng Việt Nam jing kriê dlăng mơ̆ng hdră kriê dlăng hră mơar klei suaih pral mnuih ƀuôn sang, čih klei hâo hưn kơ hdră tlŏ mgang leh anăn srăng čih mbĭt hŏng hră mơar mnuih ƀuôn sang, mjing klei găl ênưih hĭn kơ mnuih ƀuôn sang hlăm bruă tlŏ mgang, ktuê dlăng klei êrô êbat hlăm boh klei mâo klei ruă tưp êdei anei hŏng hdră jăk hĭn.

H’Zawut pô mblang