VOV4.Êđê- Hruê anei 29-4, Anôk bruă gĭt gai mkra mlih Hdră bhiăn Gưl dlông bi kƀĭn lač kơ klei tŭ hluê ngă Hdră mtrŭn 549 mơ̆ng Khua Knŭk kna thŭn 2013 bi mklă Hdră bruă kluôm “Mkŏ mjing Sang hră Đaị học Hdră bhiăn Hà Nội leh anăn Sang hră Đại Học Hdră bhiăn ƀuôn prŏng Hồ Chí Minh jing dŭm sang hră phŭn mtô bi hriăm knuă druh kơ hdră bhiăn” leh anăn Hdră mtrŭn mrô 2083 mơ̆ng Khua knŭk kna thŭn 2013 bi mklă Hdră bruă “Mkŏ mjing Sang hră Hdră bhiăn jing anôk bi hriăm phung knuă druh Hdră bhiăn”. Êlâo anăn, hlăm tlam hruê 28-4, Khua lăn čar Nguyễn Xuân Phúc, Khua anôk bruă gĭt gai mkra mlih Hdră bhiăn gưl dlông gĭt gai leh klei bi kƀĭn mprăp kơ mta phŭn anei. Hlăm klei bi kƀĭn anei, khua gĭt gai dŭm phŭn, dhar bruă leh anăn dŭm sang hră lač dŭm klei kčĕ kơ kdrăp mnơ̆ng, klei găl duh bi liê leh anăn klei akâo lŏ dơ̆ng ngă dŭm hdră bruă hluê si dŭm Hdră mtrŭn 549 leh anăn 2083 mơ̆ng Khua Knŭk kna. Khua gĭt gai dua sang hră đaị học Hdră bhiăn ăt čang hmăng knŭk kna akâo bi tăng mgăl hdră bhiăn leh anăn mguôp klei blŭ hlăm bruă mkŏ mjing hdră êlan. Blŭ hrăm ti anôk bi kƀĭn, Khua lăn čar bi mni kơ dŭm sang hră mâo leh lu klei gĭr ktưn hlăm bruă hluê ngă Hdră bruă hluê si dŭm hdră mtrĭn 549 leh anăn 2083 hlăm wưng êgao. Hnơ̆ng prŏng leh anăn hnơ̆ng jăk bi hriăm dưi mđĭ, jing dŭm anôk bruă mjuăt bi hriăm mâo anăn knăl hlăm ala čar.