VOV4.Êđê - Tlam hruê 24-3, Dương Văn Trang - Khua hlăm bruă Đảng gưl dlông gĭt gai mmông mă bruă hŏng Êpul hgŭm phung duh mkra mda asei čar. Dưi mkŏ mjing mơ̆ng mlan 12/2020, Êpul hgŭm phung mda asei čar Kon Tum ară anei mâo 154 čô mnuih hŏng 10 êpul, 11 êpul bruă. Dŭm êpul bruă anei ba yua jih klei găl, klei mâo, rông tŭ jing đông trùng hạ thaỏ, pla, mkra mjing, ba čhĭ tŭ dưn mtei pui, mkra mjing leh anăn ba čhĭ mnơ̆ng dhơ̆ng mơ̆ng kphê, mkra mjing, mđĭ kyar mnơ̆ng dhơ̆ng pioh dlăng mdê hjăn.

Êpul hgŭm phung mnia blei mda asei čar Kon Tum ăt mkŏ mjing lu bruă kơ yang ƀuôn, đru phung mâo klei hdĭp dleh dlan êbeh 160 êklăk prăk. Blŭ hrăm hlăm mmông mă bruă, Khua bruă Đảng čar Kon Tum đaŏ knang kơ phung mnia blei mda asei srăng duah hdră mrâo čiăng ba yua jih 2 klei găl, klei mâp prŏng ti alŭ wăl: hiu čhưn ênguê leh anăn ana êa drao. hlăm wưng kơ anăp, dŭm anôk bruă mnia blei brei lŏ dơ̆ng gĭr pŏk mlar bruă mnia blei, mđĭ ktang klei bi hgŭm hŏng anôk bruă mnia blei čar mkăn čiăng mđĭ kyar bruă mkra mjing, boh nik mkra mjing sâm hruê̆, boh mnga lŏ hma mđing truh kơ bruă ba čhĭ kơ ala tač êngao, mjing dŭm mta mnơ̆ng dhơ̆ng mdê hjăn mơ̆ng Kon Tum.

H’Zawut pô mblang