VOV4.Êđê- Êbeh 10 thŭn ngă Khua ƀuôn, A Bưn, mnuih djuê ana Bahnar ti ƀuôn Kon Tum Kơ Pâng, ƀuôn hgŭm Thắng Lợi, ƀuôn prŏng Kon Tum, čar Kon Tum sĭt êmĭt mtrŭt mjhar mnuih ƀuôn sang mkŏ mkra klei hdĭp kreh dhar ti krĭng mnuih ƀuôn sang dôk, đru bi kjăp klei hgŭm mguôp jih jang mnuih ƀuôn sang. Ñu ăt jing gru mngač kdlưn êdi hlăm hdră mă bruă, pla mjing, mbruă bruă duh mkra.

Khua ƀuôn A Ƀưn mĭn knŏng klei gĭr, jih ai tiê hlăm klei mă bruă knuă srăng đru kơ bruă duh mkra mâo klei đĭ kyar. Čiăng dưi ngă sơnăn, srăng mâo nanao klei hriăm, bi mjut klei thâo lehanăn bi lih klei mĭn hlăm bruă duh mkra, thâo truăn pla dlăng kriê sa mta mnơ̆ng pla, amâodah pla pluă lu mta ana pla mjing lehanăn mlih ana pla mjing grăp yan.

Thŭn 2019, êjai ênoh čhĭ êya hlăk dôk đĭ, ñu jhŏng ba mlih 6 sao lăn pla hbei blang pioh pla êya. Leh kơ 8 mlan kriê dlăng, gŏ sang ñu dưi mâo truh kơ 200 êklăk prăk kyua bruă čhĭ êya mtah. Êjai hlăm wưng dôk guôn yan pĕ 5 ha kphê lehanăn 3 ha ana kđuič, ñu lŏ pla thiăm hbei ƀlang, mtei lehanăn mdiê lŏ čiăng mâo nanao prăk ba wĭt lehanăn mâo klei hơĭt kjăp. Mơ̆ng dŭm ênoh prăk mkiêt mkuôm hlăm gŏ sang, ñu mâo klei mĭn srăng blei sa boh êdeh ôtô čiăng dŭ mdiăng mnơ̆ng dhơ̆ng mơ̆ng bruă lŏ hma kơ mnuih ƀuôn sang. Leh hrui mă jih jang prăk duh bi liê, prăk mngă kah knar grăp thŭn hlăm gŏ sang hlăm ƀrô 250 - 300 êklăk prăk. Khua ƀuôn A Ƀưn lač: “Grăp blư̆ pô sơaĭ srăng nao êlâo, mơ̆ng bruă lŏ hma truh kơ bi đru hdơ̆ng găp. Kâo ăt mâo lŭ blư̆ nao mtrŭt mjhar kơ ayŏng amai adei mnuih ƀuôn sang, kâo nao êlâo leh, ayŏng amai adei mnuih ƀuôn sang nao êdei čiăng mâo klei bi mguôp hrăm mbĭt čiăng dưi lăm lui klei ư̆ êpa lehanăn bi hrŏ klei knap mñai.”

A Bưn hlăm sa klei bi kƀĭn phung êdah kdlưn thâo ngă bruă duh mkra

Mơ̆ng klei bi hmô mơ̆ng khua ƀuôn A Ƀưn hlăm bruă duh mkra, klei thâo gĭr hlăm bruă knuă, mkŏ mkra ti ƀuôn Kon Tum Kơ Pâng knư̆ hruê knư̆ mâo klei pŏk lar. Hlăm ƀuôn mâo 365 gŏ sang, hŏng êbeh 1.500 čô mnuih hlăm ƀrô 80% jing mnuih djuê ƀiă. Klei gĭr mđĭ kyar bruă duh mkra mơ̆ng dŭm gŏ sang dưi đru leh kơ ênoh prăk ba wĭt kah knar hlăm sa čô mâo êbeh 27 êklăk prăk/thŭn. Bruă duh mkra mâo klei đĭ kyar, hơĭt kjăp, mnuih ƀuôn sang mâo klei bi mguôp, hrăm mbĭt mkŏ mkra klei hdĭp dhar kreh hlăm anôk dôk.

Nguyễn Văn Hùng, khua gĭt gai bruă sang čư̆ êa ƀuôn hgŭm Thắng Lợi, ƀuôn prŏng Kon Tum, čar Kon Tum brei thâo: “A Ƀưn jing khua ƀuôn ti ƀuôn Kon Tum Kơ Pâng êbeh 10 thŭn leh. Thŭn leh êgao, mnuih ƀuôn sang ăt mâo klei đăo knang čuăn ruah ñu lŏ ngă khua ƀuôn wưng thŭn 2020-2022. Hlăm dŭm hruê mmông mă bruă, A Ƀưn mâo na nao klei hur har, boh nik hlăm bruă hâo hưn, mtrŭt mjhar kơ mnuih ƀuôn sang tui ngă čiăng msĕ ƀuôn prŏng, ngă êlan klông hŏng pê tông. A Ƀưn jing sa čô mâo klei bi hmô čiăng kơ mnuih ƀuôn sang srăng tui ngă msĕ.”

Kriăng hlăm klei mă bruă knuă, thâo mĭn hlăm bruă mkŏ mkra dưi đru kơ khua ƀuôn A Ƀưn ti ƀuôn prŏng Kon Tum mâo klei mdrŏng sah hlăm klei hdĭp, lehanăn mâo klei hơ̆k mơak hlăm gŏ sang. Hŏng klei thâo mĭm klưn hĭn lehanăn mâo lu klei đru kơ ƀuôn sang, khua ƀuôn A Ƀưn jing sa klei bi hmô mngač hlăm klei bi lông khăp kơ ala čar brei kơ mnuih ƀuôn sang tui hriăm lehanăn tui ngă.

Pô mblang: Y-Khem Niê