VOV4.Êđê -Ti anôk mphŭn pŏk Klei bi kƀĭn tal 11, Quốc hội gưl 14, Khua gĭt gai Đảng – Khua lăn čar Nguyễn Phú Trọng hưn mdah hdră mă bruă wưng thŭn 2016 – 2021 mơ̆ng Khua lăn čar. Sa hlăm dŭm bruă klam phŭn hlăm wưng păn bruă êgao jing ngă bi leh hdră bruă knuă druh gưl dlông mơ̆ng Knŭk kna. Khua lăn čar bi siñe bi mklă leh 5 čô K’iăng khua knŭk kna, 21 čô Khua phŭn bruă lehanăn phung khua mkăn hlăm Knŭk kna wưng thŭn 2016 – 2021.

Khua gĭt gai Đảng, Khua lăn čar Nguyễn Phú Trọng mâo leh lu hdră bruă hŏng tač êngao yuôm bhăn, krơ̆ng kjăp klei kiă kriê kluôm ênŭm krĭng lăn ala čar, mđĭ k’hưm mơ̆ng Việt Nam hlăm krĭng lehanăn tar rŏng lăn. Khua gĭt gai Đảng, Khua lăn čar Nguyễn Phú Trọng mñă klă, bruă lŏ krŭ wĭt ai tiê khăp čiăng kơ lăn čar, klei ktưn hưn djuê ana, ai ktang klei bi hgŭm mguôp jih jang djuê ana lehanăn klei čang hmăng đĭ kyar mơ̆ng sa ala čar sah mdrŏng, yâo m’ak jing sa klei hriăm yuôm bhăn. Hlăm wưng ti anăp, brei lŏ dơ̆ng pŏk mlar, mđĭ kyar lehanăn mđĭ hĭn klei bi mjĕ hŏng tač êngao, mjing klei đăo knang kjăp hlăm bruă kđi čar, msir mghaih djăp bruă mâo hŏng klei djŏ klă, tŭ dưn hŏng dŭm ala čar riêng gah, ala čar prŏng, dŭm ƀĭng hgŭm phŭn, ƀĭng hgŭm kluôm dhuôm lehanăn ƀĭng hgŭm mkăn, krơ̆ng kjăp wăl anôk êđăp ênang, h’ĭt kjăp kñăm mđĭ kyar lăn čar./.

H’Nêč pô mblang