VOV4.Êđê -  Ƀri klei bi kƀĭn prŏng kluôm ala tal 8, mơ̆ng Đảng Cộng sản Cuba mâo mkŏ mjing tŭ dưn jăk siam, Khua gĭt gai Đảng Nguyễn Phú Trọng mâo leh klei blŭ hrăm hlăm đĭng blŭ hŏng Miguel Diaz-Canel Bermudez, khua gĭt gai tal sa Êpul khua kiă kriê bruă Đảng gưl dlông Cộng sản Cuba, khua lăn čar Cuba.Khua gĭt gai Đảng Nguyễn Phú Trọng hơêč hmưi jih ai tiê Đảng Cộng sản Cuba mâo mkŏ mjing tŭ dưn jăk siam klei bi kƀĭn prŏng kluôm ala tal 8, hơêč hmưi kơ khua gĭt gai Miguel Diaz Canel mâo leh gưl dlông Đảng Cộng sản Cuba đăo knang ruah jing khua kiă kriê tal sa, bi êdah klei đăo knang Đảng Cộng sản Cuba srăng lŏ dơ̆ng kiă kriê lăn čar Cuba ayŏng adei dưi găn jih klei dleh dlan, klei lông dlăng, hlue ngă tŭ jing djăp mta kñăm, hdră êlan mơ̆ng klei bi kƀĭn prŏng tal 8 mtrŭn leh, rŭ mdơ̆ng lăn čar Cuba yang ƀuôn ngă phŭn mdrŏng sah, kjăp ktang. Khua gĭt gai Đảng Nguyễn Phú Trọng mñă, Việt Nam djă yuôm lehanăn čang hmăng lŏ dơ̆ng mtrŭn agha êlam hĭn klei bi mguôp yuôm bhăn dua Đảng, dua knŭk kna Việt Nam – Cuba, čang hmăng hlăm wưng kơ anăp, dua nah lŏ dơ̆ng bi mguôp kjăp hĭn pioh ngă tŭ jing klei leh bi tŭ ư gưl dlông dua nah, mđĭ kle ibi mguôp Việt Nam – Cuba dưi hyuă kjăp hĭn, klă mngač hĭn./.

Y Khem pô mblang