VOV4.Êđê - Aguah mbrue (5/5), ti Hà Nội mkŏ mjing leh knăm bi hdơr 70 thŭn hruê mkŏ mjing knơ̆ng prăk knŭk kna Việt Nam (6/5/1951 – 6/5/2021) lehanăn tŭ drông klei tŭ mă anăn knăl mă bruă mrô sa. Khua gĭt gai Đảng Nguyễn Phú Trọng nao lehanăn blŭ hrăm ti anăn. Lŏ bi hdơr jih jang knhuah gru bruă mkŏ mjing lehanăn klei đĭ kyar mơ̆ng knơ̆ng prăk. Khua knơ̆ng kiă kriê knơ̆ng prăk knŭk kna Việt Nam Nguyễn Thị Hồng lač, Lŏ wĭt dlăng hlăm 70 thŭn êgao, bruă knơ̆ng prăk mâo nanao klei myưng m'ang kơ dŭm boh tŭ jing, đru leh kơ bru knơ̆ng prăk hlăm klei mkŏ mjing, mđĭ kyar lehanăn răng mgang lăn čar. Bi mni kơ dŭm boh tŭ dưn leh mâo mơ̆ng knơ̆ng prăk, Khua gĭt gai Đảng Nguyễn Phú Trọng mñă: Čiăng dưi bi sĭt dŭm mta kñăm mđĭ kyar lăn čar, bruă knơ̆ng prăk hŏng klei klam jing boh phŭn kơ bruă duh mkra, năng lŏ dơ̆ng mđĭ kyar kluôm dhuôm, bi gĭr prŏng hĭn, dưn yua bi jih klei găl mâo, lehanăn mă klei hriăm mơ̆ng dŭm klei tŭ jing leh, lŏ mghaih msir bi kjăp djăp mta bruă adôk awăt êdu, kñăm pai mă jih jang klei găl čiăng atăt lăn čar đĭ kyar pral, lehanăn kjăp hĭn hlăm ênuk gưl mrâo./.

Y Khem pô mblang