VOV4.Êđê - Hlăm dŭm hdră êlan mă bruă ti dŭm čar krĭng Ngŏ dưr, hruê 5/5, khua Quốc Hội Vương Đình Huệ, khua kiă kriê bruă ruah khua tar ala čar mbĭt hŏng êpul mă bruă mơ̆ng Quốc Hội mâo leh klei nao ksiêm dlăng bruă mprăp kơ klei ruah pô bi ala Quốc Hội gưl 15 lehanăn pô bi ala HĐND dŭm gưl wưng thŭn 2021-2026 ti anôk mplĕ hră mrô 4, alŭ Thèn Pả, să Lũng Cú, kdriêk Đồng Văn lehanăn mâo klei mă bruă hŏng êpul khua êmua hlăm čar. Dhar bruă ruah khua čar Hà Giang, nao čuă lehanăn mđĭ ai dŭm čô knuă druh kđông kahan răng mgang knông lăn Lũng Cú. Blŭ hlăm klei mă bruă anăn, khua Quốc Hội Vương Đình Huệ mñă kơ čar Hà Giang, hlăm klei mprăp kơ bruă ruah khua ăt srăng mđing uêñ kơ klei mđĭ kyar bruă duh mkra - ala ƀuôn, rơ̆ng kơ klei êđăp ênang, klei hdĭp hlăm yang ƀuôn, hlăm bruă mkŏ mkra klei bi tuôm hŏng phung mplĕ hră, khua Quốc Hội Vương Đình Huệ lŏ mñă, dŭm čô mgơ̆ng asei ngă pô bi ala Quốc Hội gưl dlông wĭt mgơ̆ng asei ti alŭ wăl, hlăm 1 - 2 hruê kơ anăp, srăng ngă klei ksiêm mkă kman êlâo kơ bi tuôm hŏng phung mplĕ hră, čiăng mâo klei êđăp ênang hlăm bruă gang mkhư̆ klei ruă tưp Covid-19.

Y Khem pô mblang