VOV4.Êđê- Lŏ čuê kơ hdră êlan mă bruă hŏng dŭm anôk bruă mơ̆ng Quốc Hội, hruê 26/4, khua Quốc Hội Vương Đình Huệ kiă kriê leh klei mă bruă hŏng êpul kiă kiê dhar bruă hlăm yang ƀuôn, dhar bruă klei bhiăn mơ̆ng Quốc Hội. Blŭ hlăm klei mă bruă anăn, khua Quốc Hội Vương Đình Huệ lač, dhar bruă dŭm klei mâo hlăm yang ƀuôn čiăng thâo săng hĭn bruă klam, klei dưi mơ̆ng anôk bruă hlăm dŭm mta bruă msĕ si: klei mă bruă, bruă mă, bruă mdrao mgŭn, ênoh mnuih ƀuôn sang, klei hdĭp hlăm yang ƀuôn, klei đru yang ƀuôn, klei mtăp mđơr êkei mniê, êpul kiă kriê phung khua êmua mniê… jing dŭm klei dleh dlan, leh anăn mâo klei bi lar ktang. Khua Quốc Hội Vương Đình Huệ mñă klă, dhar bruă anei srăng mâo klei duh mĭn hĭn kơ dŭm mta klei mâo hlăm yang ƀuôn leh anăn kơ dŭm klei mâo hlăm bruă dih mkra, mâo klei čhŏng nao hlăm bruă ksiêm dlăng klei bhiăn, bi mlih, mđĭ hnơ̆ng jăk, boh tuĭ dưn mơ̆ng dŭm bruă ngă mơ̆ng dhar bruă dŭm klei mâo hlăm yang ƀuôn hlăm jih mta bruă mkŏ mkra klei bhiăn, ksiêm dlăng leh anăn nao hlăm bruă bi mklă dŭm klei yuôm bhăn mơ̆ng ala čar, boh nĭk dưi ba êwa klei hdĭp truh ti anôk Quốc Hội, truh hlăm dŭm hdră êlan klei bhiăn.

Pô mblang: Y-Khem Niê