VOV4.Êđê-  Aguah mbrue (26/4) Phan Diễn, Khua keh yang ƀuôn mdrơ̆ng hŏng klei yan adiê ngă hlăm knơ̆ng bruă Ngăn dŏ wăl hdĭp mda, sang hră Đại học ala čar Hà Nội djă akŏ êpul mă bruă, mâo leh mmông mă bruă hŏng čar Gialai kơ dŭmbruă kiă kriê, lehanăn răng mgang, mđĭ kyar dliê. Hâo mdah ti anôk mă bruă brei ƀuh, 5 thŭn leh êgao, ênhă dliê ti Gialai mâo êbeh 25 êbâo ha. Truh knhal jih thŭn 2020, hnơ̆ng dliê luôm hlăm čar truh 46,7%, bruă kiă kriê, răng mgang dliê, gang mkhư̆ klei pui ƀơ̆ng mâo leh klei kiă kriê kjăp. Blŭ hrăm ti anôk mă bruă, Phan Diễn khua kiă kriê keh yang ƀuôn mdrơ̆ng hŏng klei yan adiê ngă mđĭ ai kơ alŭ wăl kơ jih jang klei dleh dlan hlăk dôk găn.

Keh anei srăng đru kơ čar mkŏ mjing hdră ngă bruă čiăng kơ jih jang mnuih hlăm čar đru bi pla kyâo prŏng jing kyâo kmrơ̆ng, amâo lŏ pla ôh kyâo čiăng mâo mă djăl, amâodah pla pluă hlăm war kphê čiăng mđĭ ênoh ba wĭt êjai, lehanăn mđĭ hnơ̆ng h’up êyui đru bi răng mgang lăn. Siămdah, čar ăt bi mâo hĕ mơh hdră êlan mă bruă đru kơ phung ƀuôn sang mâo klei hdĭp hơĭt êjai ka mâo ƀơ̆ng mnơ̆ng pô pla mjing, čiăng kơ digơ̆ hơĭt ai tiê mă bruă mđĭ kyar dliê./.

Pô mblang: Y-Khem Niê