VOV4.Êđê - Gĭt gai lehanăn blŭ hrăm ti anôk bi kƀĭn trực tuyến hŏng Anôk bruă git gai ala čar lehanăn 63 čar, ƀuôn prŏng kơ hdră gang mkhư̆ klei ruă tưp Covid 19 mkŏ mjing hlăm tlam hruê 7/5 ti Anôk bruă knŭk kna, Khua knŭk kna Phạm Minh Chính mñă klă, amâo dưi lui mâo sa čô kƀah klei thâo săng hlăm hdră gang mkhư̆ klei ruă tưp ba klei truh amâo jăk kơ kluôm yang ƀuôn. Mơ̆ng hdră tui duah lehanăn bi mklă phŭn ba mtưp klei ruă, Anôk gĭt gai bruă ala čar bi mklă, anôk bluh mâo klei ruă ti Hà Nam djŏ tuôm kơ pô ruă 2899, ti Yên Bái, Vĩnh Phúc djŏ tuôm kơ êpul phung thơ̆ng kơ bruă mơ̆ng Ấn Độ lehanăn Trung Quốc, ti Sang êa drao K tưp lar mơ̆ng anôk bluh mâo klei ruă ti Sang êa drao mdrao klei ruă krĭng hlơr gưl dlông. Khă snăn, anôk bluh mâo klei ruă ti Sang êa drao mdrao klei ruă krĭng hlơr gưl dlông lehanăn dŭm čô ruă ti Đà Nẵng, Hải Dương amâo thâo klă ôh phŭn agha bi mtưp klei ruă. Klei anei brei ƀuh, hlăm êpul êya dôk mâo kman klei ruă. Mơ̆ng anôk bluh mâo klei ruă ti Sang êa drao K lehanăn Sang êa drao mdrao klei ruă krĭng hlơr gưl dlông, Khua phŭn bruă mdrao mgŭn Nguyễn Thanh Long mñă, dŭm boh sang êa drao brei pŏk mlar hdră ksiêm dlăng ti dŭm krĭng huĭ srăng bluh mâo klei ruă msĕ si adŭ ksiêm mkă dlăng klei ruă, dŏng mdrao mjêč. Mnuih ruă lehanăn phung mă bruă mdrao mgŭn brei mkă dlăng kman grăp gưl, čiăng pral hmao ƀuh mnuih djŏ klei ruă.

Blŭ hrăm ti anôk bi kñĭn, Khua knŭk kna Phạm Minh Chính mtă brei lŏ ƀư̆ mkra, amâo dưi ngă ngơi hlăm hdră gang mkhư̆ klei ruă. Khua knŭk kna ăt mtă, dŭm alŭ wăl tơdah mâo klei ruă, amâo mâo kdjăt kƀla, ƀiădah brei mâo klei mđing răng, hluê ngă kjăp hdră gang mkhư̆ klei ruă./.

H’Nêč pô mblang