VOV4.Êđê-  Tlam 22/3, ti sang bruă knŭk kna, êpul bruă bi lông - pah mni gưl dlông mâo leh klei bi kƀĭn mâo khua knŭk kna Nguyễn Xuân Phúc, Khua gĭt gai êpul bruă kiă kriê klei bi kƀĭn. Blŭ ti klei bi kƀĭn, khua knŭk kna Nguyễn Xuân Phúc bi mklă, hlăm wưng thŭn leh êgao lăn čar mâo lu klei dleh dlan, bruă bi lông, pah mni mâo klei mlih mrâo, klei knhâo, dưi ngă jih bruă klam.

Hlăm wưng ti anăp. Khua knŭk kna mñă kơ êpul bruă mkŏ mjing bruă klei bi lông hŏng klei klă sĭt, mâo boh tŭ dưn, tui hlue boh phŭn mâo leh, klei gĭt gai mơ̆ng khua gĭt gai Đảng, khua lăn čar leh anăn 5 boh phŭn klei bi lông mơ̆ng khua knŭk kna mtrŭt mjhar ti klei bi lông tar ala čar tal X. Khua knŭk kna ăt mtrŭt mjhar bruă hâo hưn, bi lar kơ dŭm klei bi lông klă sĭt, mâo boh tŭ dưn, dŭm hdră bi hmô, gru hmô, mnuih jăk, bruă jăk. Ngă bruă pah mni djŏ hŏng hdră bhiăn, klă mngač. Klei bi lông, pah mni čiăng kñăm kơ gưl nah gŭ.  

Pô mblang: Y-Khem Niê