VOV4.Êđê -  Hruê 18-5, Khua Knŭk kna Phạm Minh Chính mă bruă hŏng Phŭn bruă rŭ mdơ̆ng kơ boh klei hluê ngă bruă klam mơ̆ng dhar bruă, dŭm bruă adôk êdu kƀah, mjêč brei msir mgaih, dŭm bruă yuôm bhăn, sui thŭn, dŭm klei kčĕ, klei akâo mơ̆ng dhar bruă. Mă bruă hŏng Phŭn bruă rŭ mdơ̆ng, Khua Knŭk kna Phạm Minh Chính lač kơ lu hdră tă yuôm bhăn čiăng mđĭ kyar dhar bruă hlăm wưng kơ anăp, msĕ si mđĭ kyar lăn mkra sang dôk mguôp hŏng klei mtăp mđơr leh anăn đĭ kyar ala ƀuôn, ba buôn prŏng đĭ kyar jing sa bruă duh mkra yuôm bhăn, dlăng myuôm leh anăn duh bi liê djŏ hnơ̆ng kơ bruă čuăl mkă, mkŏ mjing klei bhiăn iêu jăk klei găl, Khua Knŭk kna mñă, “dưi mâo 1 prăk bi liê êngao knŭk kna ăt jing yuôm mơh”. Khua phŭn bruă rŭ mdơ̆ng Nguyễn Thanh Nghị lač dŭm klei tŭ dưi mâo hlăm bruă kriê dlăng. Hlăm wưng thŭn 2016-2020, Phŭn bruă ktuê dlăng, lăm lui dŭm klei kčah mtrŭn mtŭk mtul mơ̆ng dŭm hră mơar hluê ngă djŏ hdră bhiăn, mđĭ ktang mkra mlih hră mơar. Phŭn bruă kƀĭn hluê ngă hdră mđĭ kyar sang dôk, truh thŭn 2020, kluôm ala ngă leh anăn hlăk dôk ngă hlăm brô 5 êbâo mta bruă sang dôk, wăl ƀuôn prŏng mrâo (đĭ giăm 3 blư̆ mkă hŏng thŭn 2010). Bruă lăn ala sang dôk ka mâo ôh klei bi knăl amâo jăk.

H Zawut pô mblang