VOV4.Êđê - Tlam hruê 18-03, ti Anôk bruă knŭk kna, Khua Knŭk kna Nguyễn Xuân Phúc drông Êpul mđĭ kyar bi hgŭm bruă duh mkra Việt Nam - ASEAN. Hlăm klei bi tuôm, bi ala dŭm anôk bruă mnia blei hlăm Êpul mđĭ kyar bi hgŭm bruă duh mkra Việt Nam - ASEAN bi êdah klei mđing dlăng, đru mơ̆ng Knŭk kna, dŭm phŭn, dhar bruă leh anăn alŭ wăl wưng êgao, bi mni bruă Knŭk kna ktuê dlăng tŭ jing Klei ruă Covid-19, mơ̆ng năn mđĭ lar bruă mkra mjing mnia blei hơĭt kjăp hlăm klei hdĭp ară anei. Khua Knŭk kna bi mklă, Đảng, Knŭk kna mjing nanao klei găl kơ mnuih ƀuôn sang, anôk bruă mnia blei đĭ kyar, mkra mjing mrâo mrang, răng mgang klei dưi klă sĭt kơ mnuih ƀuôn sang, anôk bruă mnia blei. Khua Knŭk kna čang hmăng dŭm anôk bruă mnia blei, dŭm Êpul mđĭ kyar bi hgŭm bruă duh mkra Việt Nam - ASEAN, mđing mđĭ kyar mtah, mnia blei kpă ênuah, răng mgang wăl hdĭp mda, bi kdơ̆ng hŏng klei ƀơ̆ng ngăn.

H’Zawut pô mblang