VOV4.Êđê - Tlam hruê 10/5, Khua knŭk kna Phạm Minh Chính gĭt gai leh Klei bi kƀĭn plah wah Anôk bruă knŭk kna hŏng Anôk bruă ala čar gĭt gai hdră gang mkhư̆ klei ruă Covid 19 čiăng bi trông kơ dŭm hdră msir mghaih klei êdu kƀah, mbĭt anăn ba mtrŭn dŭm hdră msir kjăp ktang hĭn hlăm bruă gang mkhư̆ klei ruă Covid 19. Dŭm klei blŭ ti anôk bi kƀĭn mñă klă, ară anei drei ăt dưi ksiêm dlăng klei ruă anei, khădah gưl bluh mâo klei ruă tal anei mâo hnơ̆ng tưp lar pral hĭn, tưp hlăm lu anôk hĭn lehanăn hmăi amâo mâo jăk ktang hĭn mơh.

Ƀiădah tơ drei amâo mâo hdră msir mjêč, ktang kjăp hĭn, tơdah amâo mđing răng amâo dah mâo klei mĭn dôk čang guôn drei srăng tŭ klei truh jhat. Kyua anăn, Khua knŭk kna mtă brei drei mđĭ lar boh tŭ lehanăn klei thâo hlăm hdră gang mkhư̆ klei ruă hlăm 3 gưl bluh mâo êlâo kơnăn, h’ĭt ai tiê, thâo klă klei dôk mâo, pral kdal, hluê ngă tŭ dưn dŭm hdră msir djŏ guôp, hluê si klei gĭt gai mơ̆ng Anôk dlăng bruă Đảng, knŭk kna, Khua knŭk kna lehanăn Khua anôk bruă gĭt gai mơ̆ng ala čar./.

H Nêč pô mblang