VOV4.Êđê- Aguah mbruê 17-3, Khua knŭk kna Nguyễn Xuân Phúc gĭt gai klei bi kƀĭn trực tuyến plah wah Dhar bruă Knŭk kna hŏng Anôk bruă gĭt gai ala čar gang mkhư̆ klei ruă Covid-19 hŏng 63 čar, ƀuôn prŏng kơ bruă lač kơ klei tŭ bruă gang mkhư̆ klei ruă tưp hlăm wưng êgao, bi trông dŭm hdră msir prŏng čiăng gang mkhư̆ klei ruă tưp tŭ dưn hlăm wưng kơ anăp. Blŭ hrăm ti anôk bi kƀĭn, Khua knŭk kna Nguyễn Xuân Phúc lač klă, drei gang mkhư̆ tŭ dưn dŭm gưl klei ruă tưp lar hlăm êpul êya hlăm bŏ 1 thŭn, klă sĭt jing 14 mlan êgao. Bruă gang mkhư̆ klei ruă Covid-19 mơ̆ng ala čar drei mâo dlông rŏng lăn bi mni hlăm lu klei bi kƀĭn, bruă hâo hưn. Hlăm wưng kơ anăp, bruă ktuê dlăng klei ruă tưp jưh knang hlăm bruă mđĭ kyar vacxin. Khădah, phŭn mkăp vacxin blei mơ̆ng ala tač êngao adôk kƀah leh anăn vacxin hlăm ala čar mĭn tĭng truh gưl IV thŭn 2021 srăng mâo. Ară anei brei lŏ dơ̆ng mđĭ lar dŭm hdră gang mkhư̆ klei ruă tưo hluê si hdră gang mkhư̆ 5 klei mtă, anei jing dŭm hdră gang mkhư̆ klei ruă tưp ênưih, mkiêt mkriêm leh anăn tŭ dưn hlăm wưng ară anei.

Pô mblang: H’Zawut Ƀuôn Yă