VOV4.Êđê- Ti anăp klei knư̆ hruê knư̆ dleh ksiêm dlăng mơ̆ng klei ruă tưp Covid-19, lŏ mâo dŭm klei hyưt lehanăn dleh ksiêm dlăng hĭn. Khua knŭk kna Phạm Minh Chính mâp leh săp mtrŭn gĭt gai bruă mđĭ hĭn boh tŭ dưn mơ̆ng bruă gang mkhư̆ klei ruă tưp Covid-19. Hlăm săp mtrŭn bi êdah klă: dŭm klei ngă ngơi mang, luič klei răng, amâo mâo bruă klam, mâo tui ngă djŏ hdră bhiăn, hdră êlan hlăm klei gang mkhư̆ klei ruă tưp srăng mâo klei bi kmhal tui hluê klei bhiăn mơ̆ng knŭk kna ala čar Việt Nam. Khua knŭk kna mñă kơ dŭm knơ̆ng, dhar, dŭm alŭ wăl srăng ksiêm dlăng, bi mbŏ, bi kluôm ênŭm dŭm hdră êlan kơ bruă mdrơ̆ng lehanăn gang mkhư̆ klei ruă tưp Covid-19 tui hluê klei bi mbha gưl, mbha klei dưi kơ dŭm knơ̆ng, dhar, dŭm alŭ wăl srăng mâo bruă ngă, mâo klei thâo mĭn hlăm bruă mdrơ̆ng lehanăn gang mkhư̆ klei ruă tưp. Tui ngă mâo boh tŭ dưn hĭn, mbĭt hŏng anăn srăng đua bruă klam kơ boh tŭ dưn hlăm bruă gang mkhư̆ klei ruă tưp lehanăn mđĭ kyar bruă duh mkra- ala ƀuôn ênuk anei.

Pô mblang: Y-Khem Niê