VOV4.Êđê- Tlam 23/3, ti anôk bruă Knŭk kna, Khua Knŭk kna Nguyễn Xuân Phúc gĭt gai klei bi kƀĭn hŏng Anôk bruă čih mkra leh anăn kđăm mkra hră hƀuê ênuk Knŭk kna Việt Nam. Kơ dŭm mnơ̆ng dhơ̆ng phŭn mơ̆ng Hƀuê ênuk Knŭk kna Việt Nam (hră mơar, rup leh anăn fim), Phŭn bruă kriê dlăng bruă knuă, anôk bruă gĭt gai brei thâo, hdruôm hră mâo 4 mta phŭn mâo hră čih ênŭm leh anăn hră hƀuê ênuk Knŭk kna Việt Nam mơ̆ng thŭn 1945 truh 2015) mĭn tĭng hưn mdah hră čih kluôm ênŭm hlăm thŭn 2021. Khua Knŭk kna Nguyễn Xuân Phúc brei thâo, anei jing hră hƀuê ênuk yuôm bhăn, brei pŏk ngă bi jăk. Anôk bruă ktuê dlăng jing Phŭn bruă mnuih mă bruă, phung hlăm dŭm anôk bruă djŏ tuôm dưi mbha bruă djŏ klă, rơ̆ng hnơ̆ng jăk, hnơ̆ng ngă, boh nik mâo dŭm klei bi trông, klei bi kƀĭn mă klei blŭ mguôp mơ̆ng phung thơ̆ng kơ bruă, phung kreh knhâo, boh nik phung hlăm Knŭk kna mơ̆ng dŭm gưl. Leh mâo Knŭk kna wưng mrâo, Phŭn bruă mnuih mă bruă brei hưn mdah bi leh anôk bruă gĭt gai, mbŏ leh anăn bi hrô phung mlih anôk mă bruă amâo dah jih thŭn mă bruă, rơ̆ng djŏ klei bhiăn mă bruă, hnơ̆ng čih mkra.

Pô mblang: H’Zawut Ƀuôn Yă