VOV4.Êđê - Mlam hrue 24/3, Khua knŭk kna Nguyễn Xuân Phúc mâo leh klei bi blŭ hrăm hlăm đĭng blŭ hŏng khua mil čhil Chile Sebastian Piñera čiăng bi trông kơ djăp hdră hyuă kjăp hĭng klei bi mguôp dua ala čar. Khua knŭk kna Nguyễn Xuân Phúc lač, klei mjĕ mgiăm dua ala čar Việt Nam – Chile mâo leh klei đĭ kyar jăk hlăm 50 thŭn êgao, lehanăn Việt Nam čang hmăng srăng lŏ mtrŭn agha êlam hĭn klei bi mguôp dua ala čar, boh nik nak hlăm bruă duh mkra mnia mblei, lehanăn klei duh bi liê.

Khua mil čhil Sebastian Piñera lač, Chile bi myuôm êdi klei bi mguôp hŏng Việt Nam, ƀuh djăp mta klei gĭr hlăm wưng leh êgao knŭk kna Việt Nam mdrơ̆ng hŏng klei ruă tưp covid 19, lehanăn dưi krơ̆ng hnơ̆ng đĭ kyar bruă duh mkra. Dua čô khua gĭt gai bi tŭ ư leh kơ dŭm hdră kñăm hyuă kjăp hĭn klei bi mguôp mâo leh mơ̆ng đưm, lehanăn jing ƀĭng hgŭm kluôm dhuôm plah wah dua ala čar hlăm wưng kơ anăp, mâo wăt bruă krơ̆ng hnơ̆ng bi mjĕ êrô gưl êpul khua prŏng, ngă tŭ jing lehanăn jêñ jêñ djăp klei bi hgŭm, kñăm truh kơ klei bi hgŭm duh mkra mnia mblei lu tĭng, lehanăn mguôp alŭ wăl êjai boh klei duh mkra mnia mblei tar rŏng lăn dôk tuôm hŏng klei amâo mâo jăk kyua klei ruă tưp covid 19./.

Y Khem pô mblang