VOV4.Êđê- Tlam hruê 17-3, drông  Khua êpul hgŭm răng mgang klei êđăp ênang ala čar Nga, Đại tướng Patrusev Nikolai Platonovich, Khua knŭk kna Nguyễn Xuân Phúc  bi êdah klei hơ̆k mơak kơ bruă Nga ksiêm hriăm leh tŭ jing, mkra mjing êa drao leh năn vacxin gang mkhư̆ klei ruă Covid-19, đaŏ knang Nga srăng hnưm hgao klei ruă tưp. Gưl hriê čhưn ti Việt Nam tal anei mơ̆ng Khua êpul hgŭm răng mgang klei êđăp ênang ala čar Nga jing yuôm bhăn, bi mkŏ dŭm bruă bi hdơr 70 thŭn mkŏ mjing klei bi hgŭm Việt - Nga. Khua knŭk kna bi mni klei tŭ mă bruă mơ̆ng Êpul hŏng Phŭn bruă kahan ksiêm leh anăn Phŭn bruă răng mgang klei êđăp ênang Việt Nam. Klei anei bi mklă klei bi hgŭm klei êđăp ênang jing mta phŭn hlăm klei bi hgŭm kluôm plah wah dua ala čar. Khua knŭk kna mtă Nga lŏ dơ̆ng mkđĭ ktang klei bi hgŭm hlăm bruă lĭng kahan, bi kdơ̆ng hŏng phung ngă soh, kyua klei tŭ mơ̆ng mnuih ƀuôn sang dua ala čar, kyua klei êđăp ênang, hơĭt kjăp leh anăn đĭ kyar.

Pô mblang: H’Zawut Ƀuôn Yă