VOV4.Êđê- Tlam hruê 23/3, ti Anôk bruă knŭk kna, Khua knŭk kna Nguyễn Xuân Phúc drông leh Pô bi ala Cộng hòa Áo Thomas Schuller - Gotzburg lehanăn Ingolf Schroeder, Khua kiă kriê Anôk bruă AT&S dôk tui duah anôk duh bi liê kơ hdră bruă tuh tia mkra mjing ba yua kdrăp mrâo hnơ̆ng prŏng. Khua knŭk kna Nguyễn Xuân Phúc hơ̆k m’ak drông Ingolf Schroeder lehanăn phung khua hlăm Anôk bruă AT&S hriê ksiêm dlăng, duh bi liê, mnia mblei ti Việt Nam. Pô bi ala bi êdah klei đăo knang dŭm hdră bruă mâo AT&S pŏk ngă srăng djŏ guôp hŏng hdră mđĭ kyar mơ̆ng Việt Nam kơ hdră jak iêu klei duh bi liê hlăm bruă tuh tia mkra mjing ba yua kdrăp mrâo.

Anei jing hdră duh bi liê prŏng hŏng hnơ̆ng 1,5 êklai euro, jai iêu hlăm brô 6 êbâo čô mnuih mă bruă. Čih yap dŭm klei blŭ mơ̆ng AT&S, Khua knŭk kna Nguyễn Xuân Phúc lač klă, dŭm hdră duh bi liê FDI hlăk ba wĭt klei tŭ jing. Knŭk kna Việt Nam srăng mjing djăp klei găl kơ phung duh bi liê ala tač êngao hriê mă bruă ti Việt Nam. Khua knŭk kna lač, klei găl kơ anôk bruă nah gŭ ti Thái Nguyên lehanăn ƀuôn prŏng Hồ Chí Minh jăk s’aĭ. Anei jing sa klei găl prŏng kơ anôk bruă duh mkra ala tač êngao. Khua knŭk kna čang hmăng AT&S hnưm bi mklă hdră mtrŭn duh bi liê./.

Pô mblang: H’Nêč Êñuôl