VOV4.Êđê- Tlam hruê 17/3, ti Anôk bruă Knŭk kna, Khua knŭk kna Nguyễn Xuân Phúc drông leh Pô bi ala Philippines Meynardo Los Banos Montealegre hriê kkuh čhưn. Khua knŭk kna Nguyễn Xuân Phúc h’êč hmưi kơ Mây-na-đo Mon-ti-li-gờ-rây jing Pô bi ala kluôm mơ̆ng Philippines ti Việt nam lehanăn brei thâo, hlăm dŭm thŭn êgao, klei bi mjĕ plah wah dua ala čar đĭ kyar jăk siam hlăm lu mta bruă, boh nik hlăm bruă êlan êa. Khua knŭk kna bi êdah klei đăo knang, pô bi ala srăng mâo wưng păn bruă tŭ jing ti Việt Nam. Khua knŭk kna ăt brei thâo, Việt Nam ară anei dôk ksiêm dlăng kjăp klei ruă Covid 19 lehanăn bruă duh mkra ăt đĭ kyar. Anei jing klei găl kơ hdră mđĭ kyar bruă duh mkra ala ƀuôn ti Việt Nam. Việt Nam bi mni klei bi mjĕ ƀĭng hgŭm kluôm dhuôm hŏng Philippines, hlăm anăn mâo klei bi mjĕ hgŭm bruă êlan êa jing yuôm bhăn. Khua knŭk kna čang hmăng kơ dua ala čar bi mđĭ hĭn hdră hgŭm duh bi liê bruă mnia mblei./.

Pô mblang: H’Nêč Êñuôl