VOV4.Êđê- Khua knŭk kna Nguyễn Xuân Phúc gĭt gai leh mmông mă bruă hŏng phung khua kiă kriê bruă Đảng ƀuôn prŏng Hà Nội. Anei jing gưl tal 9 hlăm wưng păn bruă anei, Khua knŭk kna gĭt gai mmông mă bruă, gĭt gai klei bi kƀĭn hŏng Hà Nội čiăng mđing hmư̆, gĭt gai ruh mtlaih klei dleh dlan, gun kpăk, đru kơ ƀuôn prŏng đĭ kyar pral hĭn. 3 thŭn hŏng anei, ƀuôn prŏng lŏ dŏng hluê ngă tŭ dưn ‘’hdră kñăm mdua’’, gang mkhư̆ klei ruă tưp hŏng ai tiê ‘’bi kdơ̆ng hŏng klei ruă tưp msĕ si bi kdơ̆ng hŏng phung roh’’, mbĭt anăn mtrŭt mđĭ bruă duh mkra mnia mblei. Păt čiăng jih hnơ̆ng čuăn pla mjing, mnia mblei kdlưn hĭn mkă hŏng thŭn êlâo.

Blŭ hrăm ti anôk mă bruă, Khua knŭk kna Nguyễn Xuân Phúc mñă klă, Đảng, Knŭk kna mđing dlăng nanao kơ hdră mđĭ kyar ƀuôn prŏng phŭn, klei anei dưi bi êdah klă hlăm wưng êgao nao hmư̆ lehanăn msir mghaih lu klei akâo čiăng mơ̆ng ƀuôn prŏng Hà Nội. Kơ bruă klam mđĭ kyar ƀuôn prŏng Hà Nội hlăm wưng ti anăp, Khua knŭk kna Nguyễn Xuân Phúc lŏ mñă klă kơ bruă klam jing krĭng phŭn bruă duh mkra, bruă kđi čar, bruă dhar kreh, bi mjĕ mjuk mơ̆ng kluôm ala, Gưl dlông mđing kơ ƀuôn prŏng phŭn. Kyua anăn, Hà Nội brei gĭr ktưn jing ƀuôn prŏng h’ĭt ênang, jăk siam, kjăp ktang./.

Pô mblang: H’Nêč Êñuôl