VOV4.Êđê- Hruê 21 - 3, ti čar Long An mkŏ mjing leh hlăm knăm ba yua anôk bruă tuh tia cầu cảng Phước Đông. Anôk bruă tuh tiă anei mâo ênhă giăm 130 ha, dôk hlăm anôk êlan êrô êbat jăk hlăm êlan êbat wăt êlan êa, găn truh êlan dơ̆ng prŏng ala čar 50, ƀuôn prŏng Hồ Chí Minh lehanăn dŭm čar ti krĭng lăn dap mnai êa krông Cửu Long. Nao lehanăn blŭ ti knăm ba yua, khua knŭk kna Nguyễn Xuân Phúc čih yap lehanăn lač yuôm bhăn hlăm dŭm klei gĭr, boh tŭ dưn dưi iêu jăk lu pô duh bi liê hlăm dŭm hruê leh êgao mơ̆ng čar Long An.

Khua knŭk kna mnă kơ car Long An srăng mkra klei găl, klei truăn mĭn, đru ruh dŭm klei dleh dlan, kpăk gun kơ dŭm knơ̆ng bruă, pô duh bi liê, boh nĭk hlăm wưng mâo klei ruă tŭp Covid -19. Khua knŭk kna lŏ mnă kơ čar Long An srăng lŏ dlăng yuôm bi lar dŭm klei jăk thơ̆ng mâo leh, mđĭ kyar jăk dŭm ƀuôn prŏng lehanăn krĭng ƀuôn sang, bi mklă bruă tuh tia jăk hĭn čiăng bi mđĭ kyar, dlăng yuôm bruă mđĭ kyar bruă tuh tia hŏng kdrăp mrâo mrang, bruă tuh tia kdrăp mă bruă, hŏng bruă pla mjing lŏ hma, ăt ba yua kdrăp klei mrâo mrang čiăng bi mđĭ klei hdĭp mnuih ƀuôn sang.

Pô mblang: Y-Khem Niê