VOV4.Êđê - Hruê 17/5, ti Anôk bruă knŭk kna, Khua knŭk kna Phạm Minh Chính mâo leh klei bi blŭ hrăm hluê êlan đĭng blŭ hŏng Khua knŭk kna Nhật Bản Suga Yoshihide. Hlăm ai êwa bi mjĕ mjuk, đăo knang lehanăn hgŭm bruă, dua Khua knŭk kna tĭng dlăng klei bi mjĕ Việt Nam – Nhật Bản hlăk lehanăn dôk đĭ kyar jăk siam, mbĭt anăn bi trông kơ dŭm hdră msir klă klơ̆ng kñăm mtrŭt mđĭ klei bi mjĕ ƀĭng hgŭm phŭn, êlam plah wah Việt Nam - Nhật Bản hlăm wưng ti anăp.

Dua khua knŭk kna tŭ ư mđĭ hĭn hdră bi blŭ hrăm plah wah dŭm phŭn, knơ̆ng, dhar bruă, alŭ wăl, bi hgŭm kjăp kñăm msir mghaih dŭm klei bluh mâo hlăm klei bi mjĕ plah wah dua ala čar, mkŏ mjing dŭm hdră bruă bi hdơr 50 thŭn hruê mkŏ mjing klei bi mjĕ Việt Nam - Nhật Bản hlăm thŭn 2023 năng djŏ hŏng klei bi mjĕ ƀĭng hgŭm kluôm dhuôm plah wah dua ala čar. Dua khua kiă kriê ăt bi trông kơ dŭm bruă hlăm krĭng wăl lehanăn tar rŏng lăn hdơ̆ng bi mđing, hlăm anăn mâo klei bi mlih yan adiê, tŭ ư lŏ mđĭ hdră bi hgŭm kjăp hĭn ti dŭm anôk bi kƀĭn lu tĭng, boh nik ti Liên hợp quốc, ASEAN./.

H Nêč pô mblang