VOV4.Êđê- Ƀri hlăm wưng khua knŭk kna Phạm Minh Chính dưi čuăn ruah jing pô păn bruă khua knŭk kna ala čar yang ƀuôn êngiê Việt Nam, hruê 20/4, khua knŭk kna singapore Lý Hiển Long mâo leh klei blŭ hơêč hmưi hlue êlan đĭng blŭ kơ khua knŭk kna Phạm Minh Chính. Khua knŭk kna Phạm Minh Chính mâo klei lač jăk kơ khua knŭk kna Singapore kyua mâo leh klei mơĭt hră lehanăn klei blŭ hơêč hmưi, lehanăn bi êdah klei hmăng hmưi bi mguôp kjăp hŏng khua knŭk kna Lý Hiển Long čiăng mtrŭt mjhar hĭn klei bi mguôp lu hdră êlan Việt Nam - Singapore.

2 čô khua knŭk kna 2 ala čar bi êdah klei hơ̆k mơak ti anăp dŭm klei đĭ kyar bruă bi mguôp 2 nah, khădah mâo klei dleh dlan kyua klei ruă tưp covid-19. Jih 2 čô khua knŭk kna tŭ ư srăng lŏ bi mguôp hlăm lu bruă mă jih 2 tĭng mâo klei găl msĕ si bruă ngăn prăk, kdrăp mrâo mrang, bruă lŏ hma lehanăn kan hdang, klei mtô mjuăt, lehanăn bruă rŭ mdơ̆ng…, pŏk lar dŭm bruă anăn jing dŭm hdră êlan mâo klei čiăng djŏ hŏng ênuk mrâo hlăm wưng krŭ wĭt bruă tuh tia tal 4 msĕ si mđĭ kyar pui kmlă doh, ƀuôn prŏng thâo mĭn, mlih mrâo klei mkŏ mjing, bruă duh mkra mrô lehanăn bruă mrô, kah mbha klei thâo hlăm bruă kriê dlăng lehanăn đĭ kyar bruă duh mkra, mtô mjuăt mnuih mă bruă, boh nĭk mnuih mă bruă hnơ̆ng kjăp.

Pô mblang: Y-Khem Niê