VOV4.Êđê - Tlam hruê 12/5, Khua knŭk kna Phạm Minh Chính mâo klei blŭ hrăm hŏng Khua knŭk kna Thailand Prayut Chan-o-cha. Khua knŭk kna Phạm Minh Chính mñă klă srăng mprăp kơ klei bi mguôp hŏng khua knŭk kna Prayut Chan-o-cha čiăng dưi ba klei jĕ giăm “Pô bi mguôp hdră êlan klei mđĭ kyar Việt Nam - Thailand” knư̆ hruê knư̆ kluôm ênŭm, mâo boh tŭ dưn lehanăn klă mngač.

Kah bha klă klơ̆ng dŭm hră êlan mtrŭt mjhar klei bi mguôp 2 ala čar, jih dua čô khua knŭk kna mtă kơ dŭm anôk bruă djŏ tuôm srăng bi hgŭm mkŏ mjing dŭm hdră bi hdơr kơ 45 thŭn mkŏ mjing klei êrô êbat tač êngao 2 ala čar Việt Nam - Thailand hlăm thŭn 2021, krơ̆ng mâo klei klă nik, dêč đuê̆ kơ bruă ngă khă kơ leh, krơ̆ng lehanăn bi lar boh tŭ dưn klei bi mguôp 2 ala čar. Hlăm bruă bi mguôp hlăm alŭ wăl lehanăn tar rŏng lăn, 2 čô khua knŭk kna tŭ ư srăng bi mguôp kjăp lehanăn sa ai hlăm dŭm anôk bruă prŏng msĕ si: Liên Hợp Quốc, ASEAN, APEC, mtrŭt mjhar klei mkŏ bruă êlan klông, ăt msĕ si mtrŭt mjhar klei đĭ kyar hlăm alŭ wăl êa krông Mê Kông.