VOV4.Êđê - Khua knŭk kna Phạm Minh Chính gĭt gai klei bi kƀĭn phung khua êmua knŭk kna kơ bruă mkŏ mkra klei ruah pô bi ala Quốc Hội lehanăn HĐND dŭn gưl wưng thŭn 2021-2026 hlăm wưng klei ruă tưp Covid-19 knư̆ hruê knư̆ dleh ksiêm dlăng. Dŭm klei blŭ hlăm klei kƀĭn mâo sơăi klei tŭ ư kơ dŭm hdră êlan hŏng dŭm alŭ wăl mâo klei ruă tưp Covid-19 êlâo kơ hruê ruah khua, hlăm hruê ruah khua lehanăn leh kơ hruê ruah khua. Phŭn bruă mdrao mgŭn mâo leh hdră mtrŭn kơ bruă gang mkhư̆ klei ruă tưp Covid-19 hlăm klei hruê ruah khua, kñăm hlăm 3 boh phŭn: Bi doh wăl hdĭp mda lehanăn bi mâo klei êđăp ênang hlăm wưng klei ruă klei ruă tưp Covid-19, êđăp ênang hlăm mnơ̆ng ƀơ̆ng huă, bruă đru dŏng kơ dŭm klei mjêč.

 Phŭn bruă mdrao mgŭn mâo leh klei mkŏ mkra bruă hriăm kơ dŭm anôk bruă mơ̆ng gŭ truh kơ kdriêk lehanăn čar, mbĭt anăn mâo klei mtă lŏ mđĭ bruă ksiêm dlăng. Leh kơ klei kƀĭn anei, phŭn bruă mdrao mgŭn srăng bi mguôp hŏng phŭn bruă hlăm ala čar čiăng dưi mâo klei mtô, boh nĭk hlăm dŭm hră êlan gang mkhư̆ klei ruă tưp Covid-19, mnuih ruă dôk mdrao ti sang êa drao. Dŭm boh blŭ hlăm klei bi kƀĭn ăt bi êdah, čiăng mkŏ mkra klei ruah khua djŏ mmông, mâo boh taih mnuih hŏng mnuih, guôm ƀô̆ mta lehanăn adŭ êđăp. Huôm plĕ hră anôk mâo klei ruă čiăng mâo klei mdjiê kman êkơ ngă bruă ksiêm yap hră. Čih yap dŭm boh blŭ anăn, bi ruê̆ klei bi kƀĭn, khua knŭk kna Phạm Minh Chính mñă klă bruă tui hluê klei bhiăn čiăng mkŏ mkra jăk klei ruă khua.