VOV4.Êđê - Tlam hruê 23/4, ti Anôk bruă Khua mil čhil Sang Bogor ti ƀuôn prŏng phŭn Jakarta, Indonesia êlâo kơ nao ti Klei bi kƀĭn phung khua kiă kriê ASEAN, Khua knŭk kna Phạm Minh Chính nao kkuh leh Khua mil čhil Indonesia Joko Widodo. Khua mil čhil Joko Widodo nao drông lehanăn h’êč hmưi kơ Khua knŭk kna Phạm Minh Chính mâo leh Quốc hội đăo knang ruah păn ngă Khua kiă kriê Knŭk kna.

Khua knŭk kna Phạm Minh Chính bi mni klei gĭr ktưn mơ̆ng Indonesia hlăm hdră mdrơ̆ng hŏng klei ruă Covid 19 lehanăn đăo knang Indonesia srăng hgao jih klei dleh dlan, ksiêm dlăng kjăp klei ruă tưp lehanăn mđĭ kyar bruă duh mkra – ala ƀuôn mđing truh kơ bruă hluê ngă ‘’Hnơ̆ng trah dlăng Indonesia truh kơ thŭn 2045”. Khua knŭk kna Phạm Minh Chính hưn mthâo leh hŏng Khua mil čhil Joko Widodo kơ dŭm boh tŭ Klei bi kƀĭn bruă Đảng kluôm ala tal 13 mơ̆ng Việt Nam, dŭm hdră ngă bruă hlăm Hdră kčah mđĭ kyar wưng thŭn 2021-2025 lehanăn hnơ̆ng trah dlăng truh kơ wưng thŭn 2030 - 2045 mơ̆ng Việt Nam./.

H Nêč pô mblang