VOV4.Êđê - Hruê 19/5, Khua knŭk kna Phạm Minh Chính mâo leh mmông mă bruă hŏng Phŭn bruă mnuih mă bruă, kahan êka êkeh lehanăn yang ƀuôn. Blŭ hrăm ti knăm anei, Khua knŭk kna Phạm Minh Chính mñă brei hluê ngă kjăp klei mĭn mđĭ kyar bruă duh mkra mguôp hŏng hdră mđĭ kyar lehanăn mtăp mđơr hlăm yang ƀuôn, amâo ‘’lăm lui” kyua klei mđĭ kyar lehanăn mtăp mđơr hlăm yang ƀuôn čiăng bi tiŏ êran kñăm mđĭ kyar hjăn păn bruă duh mkra, brei mđing hĭn kơ mnuih ƀun, mnuih ênưih kpĕ êka hlăm yang ƀuôn. Khua knŭk kna lač klă, Phŭn bruă adôk dŭm mta bruă ngă ka jăk. Wăl anôk ngă bruă đĭ kyar ka mđrăm mbĭt, ka mrâo mrang, ka kluôm. Hnơ̆ng tŭ jăk mă bruă ti Việt Nam ka kjăp, klei anei dôk tui hluê hŏng lu mta klei mkăn, hlăm anăn mâo bruă klam mơ̆ng phŭn bruă, boh nik hlăm hdră mjuăt bi hriăm kyua anak mnuih hŏng klei thâo săng, klei mĭn mrâo, klei thâo kơ bruă jing mta phŭn bi mklă hnơ̆ng tŭ jăk hdră mă bruă. Khua knŭk kna mtă kơ Phŭn bruă mnuih mă bruă, kahan êka êkeh lehanăn yang ƀuôn lŏ dơ̆ng hluê ngă jăk bruă klam, klei dưi maoa kčah jao, hlăm anăn kƀĭn ksiêm wĭt bruă hluê ngă Hdră mtrŭn 42/NQ-CP kơ hdră msir đru kơ mnuih ƀuôn sang tuôm hŏng klei dleh dlan kyua klei ruă Covid 19, ba mdah hdră msir djŏ guôp hlăm wưng ti anăp./.

H Nêč pô mblang