VOV4.Êđê - Tlam hruê 6/4 ti sang bruă knŭk kna, ƀri hlăm wưng Phạm Minh Chính dưi čuăn ruah jing khua knŭk kna ala čar Yang ƀuôn ngă phŭn Việt Nam, khua knŭk kna ala čar yang ƀuôn ngă phŭn Lào Phankham Viphavanh lehanăn khua knŭk kna ala čar Campuchia Samdech Techo Hun Sen mâo leh klei blŭ hlăm đĭng blŭ mơĭt klei blŭ hơêč hmưi kơ khua knŭk kna mrâo. Khua knŭk kna Lào lehanăn khua knŭk kna CampuChia bi êdah, hŏng klei đăo knang mơ̆ng Đảng, knŭk kna lehanăn mnuih ƀuôn sang ala čar Việt Nam, khua knŭk kna Phạm Minh Chính srăng ngă jăk dŭm bruă klam jao leh kơ pô.

Leh anăn mđĭ kyar ala čar Việt Nam dưi mâo dŭm klei dưi hlăm bruă mkŏ mjing lehanăn đĭ kyar ala čar Việt Nam, amâo mâo mdei mđĭ bruă klam, k’hưm Việt Nam hlăm alŭ wăl lehanăn tar rŏng lăn. Khua knŭk kna Phạm Minh Chính leh năn khua knŭk kna Lào Phankham Viphavanh tŭ ư srăng bi mđĭ boh tŭ dưn mơ̆ng klei bi mguôp 2 ala čar, tui ngă djŏ dum klei kuôl kă hlăm klei bi kƀĭn bruă hgŭm knŭk kna Việt Nam - Lào tal 43. Khua knŭk kna Phạm Minh Chính leh anăn khua knŭk kna Campuchia Samdech Techo Hun Sen ăt mâo klei tŭ ư srăng lŏ bi mguôp hlăm dŭm bruă ngă jih dua nah, leh anăn mbĭt hŏng dŭm ala čar hlăm ASEAN srăng mâo klei bi mguôp lehanăn mtrŭt mjhar bruă klam mơ̆ng ASEAN hlăm alŭ wăl.