VOV4.Êđê- Blŭ hrăm ti anôk bi kƀĭn kơ Châu Á mgi dih mâo Nikkei mkŏ mjing hlăm hrue mbrue (20/5) hŏng hdră trực truyến, Khua knŭk kna Phạm Minh Chính mñă, sa Châu Á kpưn đĭ hlăm klei êđăp ênang hơĭt mđao đĭ kyar mdrŏng sah anăn yơh jing klei êpa mhao mbĭt mơ̆ng jih jang ala čar hlăm alŭ wăl, mtăp mđơr plah wah dŭm ala čar, jing klei gĭr mơ̆ng jih jang knŭk kna, klei sa ai hrăm mbĭt anăn yơh jing kliăng pioh rŭ mdơ̆ng sa klei hdĭp jăk yâo kơ Châu Á. Mphŭn kčưm mơ̆ng hlăk thŭn 1995, Klei bi kƀĭn lu ala čar kơ Châu Á mgi dih jing leh anôk mâo klei trông čhai jêñ jêñ mâo k’hưm êdi ti Châu Á tui si Êpul grŭp Nikkei mơ̆ng Nhật Bản kiă kriê mkŏ mjing. Klei bi kƀĭn anei mâo leh lu phung khua kiă kriê gưl dlông, phung hriăm lu, phung duh mkra dŭm ala čar ti Châu Á, lehanăn phung khua bi ala mơ̆ng dŭm êpul grŭp duh mkra prŏng, mâo bruă klam lehanăn klei dưi prŏng ti Châu Á hŏng klei jing tar rŏng lăn, lehanăn jing hdră mđĭ k’hưm mơ̆ng alŭ wăl hŏng akŏ: “Lŏ tă wĭt ênuk gưl êdei kơ klei ruă tưp Covid: Bruă klam mơ̆ng Châu Á hŏng klei tar rŏng lăn krŭ wĭt"” Blŭ hrăm ti anôk bi kƀĭn, Khua knŭk kna Phạm Minh Chính lač, Việt Nam hgŭm hŏng bruă klam hrămmbĭt hŏng dŭm ala čar ksul mbŭ kơ klei êđăp ênang lehanăn klei bi mguôp kyua klei tŭ dưn mbĭt hlăm klei mđĭ kyar mdrŏng sah mơ̆ng grăp ala čar hlăm alŭ wăl kyua klei trei mđao, lehanăn jăk yâo kơ jih jang mnuih tar rŏng lăn./.

Pô mblang: Y-Khem Niê