VOV4.Êđê - Tŭ ư klei iêu jak mơ̆ng khua knơ̆ng kiă kriê êpul gruop Nikkei Tsuyoshi Hasebe, khua knŭk kna Phạm Minh Chính srăng nao hgŭm hlăm klei bi trông kơ klei hdĭp êdei dih ti Châu Á tal 26 mơ̆ng Nikkei mkŏ mjing tui hluê êlan trực tuyến mơ̆ng hruê 20-21/05/2021.

Dưi mkŏ mjing grăp thŭn mơ̆ng thŭn 1995 (knŏng amâo mâo hlăm thŭn 2020 kyua klei ruă tưp Covid-19), klei bi trông anei mâo klei đăo knang mơ̆ng tar rŏng lăn, bi mklin lu khua gĭt gai hlăm bruă kđi čar, bruă duh mkra lehanăn phung knhâo hnhăk mơ̆ng dŭm alŭ wăl Châu Á-Thái Bình Dương čiăng bi êdah dŭm klei mâo hlăm alŭ wăl lehanăn bruă klam mơ̆ng Châu Á hlăm tar rŏng lăn. Hŏng kŏ: “Ru mdơ̆ng sa ênuk leh klei ruă tưp Covid-19: Bruă klam mơ̆ng Châu Á hlăm klei mgaih msir tar rŏng lăn.” Klei kƀĭn trông gưl anei mâo klei nao hgŭm mơ̆ng lu khua gĭt gai ti Châu Á. Hlăm klei bi trông, dŭm čô khua gĭt gai lehanăn phung thơ̆ng kơ bruă bi trông kơ bruă si ngă Châu Á srăng nao hlăm ênuk mrâo hlăm wưng mâo lu klei kpăk êgun msĕ hŏng ară anei.