VOV4.Êđê - Aguah mbruê, Khua lăn čar Nguyễn Xuân Phúc nao hgŭm leh hlăm knăm bi hdơr 40 thŭn hruê mkŏ mjing sang yang Yơng Việt Nam (07/11/1981 - 07/11/2021) hŏng akŏ 40 thŭn sang yang Yơng Việt Nam ñŭ kma leh anăn đĭ kyar hŏng ala čar. Knăm anei dưi mkŏ mjing hŏng êlan online mơ̆ng anôk bi kƀĭn ti ƀuôn prŏng Hà Nội mkŏ hŏng 63 čar, ƀuôn prŏng hlăm ala čar.

Blŭ hlăm knăm anăn, Khua lăn čar Nguyễn Xuân Phúc bi ala kơ Đảng, knŭk kna mơĭt klei hơêč hmưi jăk siam hĭn kơ phung đăo Yơng, khua bi ala êpul gơ̆ng kiă kriê klei đăo Yơng, êpul gơ̆ng bruă gưl dlông sang yang Yơng Việt Nam hŏng jih jang phung đăo Yơng hlăm kluôm ala. Hŏng knhuah gru jăk siam klei đăo Yơng Việt Nam hlăm êbeh 2.000 thŭn êgao, Khua lăn čar hmăng hmưi leh anăn mâo lu klei đăo knang kơ sang yang Yơng Việt Nam hŏng jih jang phung đăo Yơng srăng mkŏ mjing klei bi mguôp djuê ana, bi mguôp dŭm klei đăo. Mbĭt anăn, lŏ hrăm mbĭt mkŏ mkra, mđĭ kyar dhar kreh Việt Nam mâo knhuah gru djuê ana.

Y Ƀel pô mblang