Hluê si klei hưn mdah, hlăm 8 mlan akŏ thŭn 2026, ênoh prăk hrui wĭt knŭk kna ti Quảng Ngãi mâo giăm 24 êbâo êklai prăk, đĭ êbeh 10% mkă hŏng wưng anei thŭn dih. Kluôm čar bi liê leh prăk duh bi liê bruă knŭk kna mâo 2.800 êklai prăk, jing 35% hdră kčah thŭn.

Čiăng mgaih msir dŭm klei dleh dlan, gun kpăk hlăm hdră hluê ngă hdră kčah mđĭ kyar bruă duh mkra - ala ƀuôn wưng thŭn 2026 - 2030, čar Quảng Ngãi akâo kơ Phŭn bruă Ngăn prăk lŏ dơ̆ng mđing dlăng, mjing klei găl kơ dŭm mta phŭn djŏ tuôm kơ Hdră mkŏ mjing Anôk bruă mkra êa pui, êwa čuh leh anăn pui kmlă ala čar ti Wăl duh mkra Dung Quất; mđĭ kyar krĭng wăl Lý Sơn jing Anôk bruă hiu čhưn ênguê êa ksĭ - plao ksĭ ala čar; pŏk ngă klei ngă hră mơar hluê ngă hdră mkra êlan dơ̆ng pral Quảng Ngãi - Kon Tum; mkra mđĭ, pŏk mlar ktuê êlan dơ̆ng mrô 24 mkŏ plah wah čar Quảng Ngãi (hđăp) leh anăn čar Kon Tum (hđăp). Mbĭt anăn, thiăm mbŏ ai dưi hluê ngă dŭm mta kñăm kơ klei kreh knhâo, kdrăp mrâo, mlih mrâo mbruă leh anăn bi mlih mrô, mjing boh kdrŭt mtrŭt mđĭ kyar bruă duh mkra ala ƀuôn, ba Quảng Ngãi jing anôk phŭn bruă duh mkra êa ksĭ mbruă mơ̆ng Ala čar./.