Khua knŭk kna bi mni kơ dŭm klei đru mguôp jăk mơ̆ng phung bi ala, Khua kiă kriê anôk bruă bi ala leh anăn dŭm Anôk bruă bi ala hlăm klei mđĭ kyar klei mjĕ giăm plah wah Việt Nam hŏng dŭm ala čar ASEAN. Khua knŭk kna mñă Việt Nam dlăng yuôm bhăn leh anăn mđing dlông hĭn kơ klei mjĕ giăm hŏng dŭm ala čar riêng gah; ƀuăn rơ̆ng lŏ dơ̆ng nao hgŭm jăk, đru mguôp čŏng pô, klă sĭt hĭn kơ klei bi mguôp ASEAN.

Khua knŭk kna mtă kơ phung bi ala, Khua kiă kriê anôk bruă bi ala lŏ dơ̆ng đru mguôp klă sĭt kơ klei đĭ kyar ktang mơ̆ng klei mjĕ giăm plah wah Việt Nam hŏng dŭm ala čar ASEAN wưng kơ anăp. Akâo kơ ASEAN gĭr ktưn bi êlam hĭn klei bi hgŭm mnia mblei - duh bi liê hlăm êpul, ba yua tŭ dưn dŭm boh kdrŭt đĭ kyar mrâo msĕ si bruă duh mkra mrô, kreh knhâo kdrăp mrâo, mlih mrâo mbruă, mđĭ klei bi mguôp hlăm dŭm mta bruă hdră êlan msĕ si anôk bruă nah gŭ, pui kmlă…; bi kjăp klei bi mjĕ mâo mơ̆ng đưm, mtrŭt mđĭ klei mjĕ êrô mnuih ƀuôn sang, bi mguôp; bruă mkŏ mjing Êpul êya ASEAN kluôm ênŭm leh anăn hơĭt kjăp, mă klei tŭ dưn mơ̆ng mnuih ƀuôn sang jing giê mkă kơ jih jang hdră êlan, bruă bi mguôp.