Leh hmư̆ dŭm klei hưn mdah leh anăn dŭm klei blŭ, Khua gĭt gai Đảng, Khua lăn čar lač klă, mơ̆ng 15 thŭn hluê ngă hdră mkŏ mkra, ƀư̆ mkra Đảng, klei čiăng kčah amâo djŏ knŏng hmao ƀuh, msir mghaih klei ngă soh ƀiădah lu hĭn jing mkŏ mjing ai dưi čŏng pô gang mkhư̆, čŏng pô mlih mrâo, čŏng pô ƀư̆ mkra, čŏng pô bi leh nanao. Khua gĭt gai Đảng, Khua lăn čar mñă klă, ai ktang mơ̆ng Đảng tal êlâo hĭn jing ai dưi thâo ƀuh, čŏng pô ƀư̆ mkra, amâo lui klei êdu kƀah lŏ wĭt ngă.

Khua gĭt gai Đảng, Khua lăn čar mñă, Hdră mtrŭn mrâo brei mjing klei bi mlih klă sĭt: êpul bruă Đảng brei ktang hĭn, êpul bruă Đảng nah gŭ brei jăk hĭn, khua gĭt gai djăp klei thâo mkŏ mjing, mkŏ mjing mđĭ kyar êpul, anôk bruă ngă bruă hŏng klei kjăp, klei dưi ksiêm dlăng kjăp, dŭm boh klei djŏ klă mơ̆ng mnuih ƀuôn sang dưi mgaih msir hŏng klei pral. Kyua anăn, brei mkŏ mjing sa hdră mtrŭn djŏ hnơ̆ng, dưi ngă, mjing klei bi mlih ktang, mđĭ klei dưi gĭt gai kiă kriê mơ̆ng Đảng, mkăp djŏ hŏng klei čiăng mđĭ kyar lăn čar hlăm wưng mrâo./.