VOV4.Êđê-  Hluê ngă hdră mă bruă ti ƀuôn prŏng Hồ Chí Minh, tlam hruê 21/5, Khua lăn čar Nguyễn Xuân Phúc nao ksiêm dlăng leh hdră gang mkhư̆, mdrơ̆ng hŏng klei ruă tưp, rơ̆ng kjăp klei êđăp ênang kơ mnuih ƀuôn sang nao ksiêm mkă dlăng klei ruă ti Sang êa drao kdriêk Củ Chi. Ti anăp wưng bluh mâo klei ruă Covid 19, Khua lăn čar lač klă, hŏng klei gĭt gai mơ̆ng Đảng, jih anôk bruă kđi čar, hlăm anăn mâo phung nai aê mdrao jih hruê mlam mă bruă, nao hlăm hdră gang mkhư̆ klei ruă tưp mơ̆ng bruă ksiêm mkă dlăng kman, čuăl krĭng, bi ktlah, mdrơ̆ng hŏng klei ruă, rơ̆ng klei suaih pral kơ jih jang mnuih ƀuôn sang. Khua lăn čar bi mni kơ êpul knuă druh, mnuih mă bruă mdrao mgŭn ƀuôn prŏng Hồ Chí Minh lehanăn Sang êa drao kdriêk Củ Chi mâo leh lu hdră msir klă sĭt, tŭ dưn hlăm hdră gang mkhư̆ klei ruă Covid 19. Mbĭt hŏng klei gĭt gai mơ̆ng Đảng, Knŭk kna, Khua lăn čar mtă kơ dŭm gưl bruă sang čư̆ êa mâo hdră gang mkhư̆ tŭ dưn klei ruă anei, boh nik ti dŭm ƀuôn prŏng, wăl tuh tia mkra mjing, krĭng hiu čhưn ênguê, dŭm sang êa drao, amâo lui boh klei amâo jăk bluh mâo./.

                                                    Pô mblang: H’Nêč Êñuôl