VOV4.Êđê -   Aguah 6/5, ti kdriêk Củ Chi, Khua lăn čar Nguyễn Xuân Phúc mbĭt hŏng phung mgơ̆ng asei phung bi ala Quốc hội gưl XV, anôk bruă ruah khua mrô 10 (kdriêk Củ Chi, Hóc Môn) nao hlăm klei hâo hưn boh klei duh mkra - dhar kreh ala ƀuôn - êđăp ênang ala čar kơ phung mgơ̆ng asei phung bi ala Quốc hội gưl XV leh anăn phung bi ala HĐND ƀuôn prŏng Hồ Chí Minh wưng thŭn 2021-2026. Klei bi kƀĭn mkŏ mjing êlâo 3 hruê klei bi kƀĭn bi tuôm plah wah phung mgơ̆ng asei Quốc hội gưl XV, anôk bruă ruah khua mrô 10 hŏng phung bi ala kơ mnuih ƀuôn sang. Klei bi kƀĭn kñăm hâo hưn kơ phung mgơ̆ng asei kơ boh klei duh mkra ala ƀuôn, răng mgang klei êđăp ênang mơ̆ng kdriêk Củ Chi, Hóc Môn wưng êgao, tă hdră mđĭ kyar hlăm wưng kơ anăp, Mbĭt anăn, hlăm klei bi kƀĭn ăt srăng bi trông leh anăn mkăp thiăm dŭm mta phŭn leh anăn phung mgơ̆ng asei mđing čiăng ba hlăm hdră ngă bruă klă klơ̆ng.  Hlăm hdră ngă bruă, Khua lăn čar Nguyễn Xuân Phúc brei thâo ktưn hưn dưi mâo Êpul hgŭm ruah khua ala čar hưn mthâo mgơ̆ng asei phung bi ala Quốc hội gưl XV ti ƀuôn prŏng Hồ Chí Minh đaŏ knang, ñu srăng gĭr jih ai tiê ngă bruă kơ ala čar, yang ƀuôn.

H Zawut pô mblang